Aqtaýlyq bloger Azamat Sársenbaevtyń ákimshilik jaýapkershilikke tartylýyna bailanysty túsinikteme Mańǵystaý oblysynyń sybailas jemqorlyqqa qarsy qyzmetiniń Instagram paraqshasynda jariialandy. Bul pikir blogerdiń ózin ustaý týraly jazbasyna qaldyrylǵan, dep habarlaidy Dalanews.kz.
Jeli qoldanýshylary bul iske belsendi aralasyp, oblystyq antikorrýptsiialyq qyzmetti belgilep, vedomstvonyń ortalyq apparaty men ákimdikke, tipti Prezidentke deiin nazar aýdartýǵa tyrysty.
"Aiypty negizdei almady"
Antikorrýptsiialyq qyzmet ókilderiniń aitýynsha, Sársenbaev sotta "qamqorlyq" jaily málimdemesin naqty dáleldermen rastai almaǵan.
"Azamat Sársenbaevtyń QR ÁQBtK-niń 73-3-baby boiynsha – sybailas jemqorlyqqa qarsy qyzmetke jala japqany úshin ákimshilik jaýapkershilikke tartylýyna bailanysty pikir bildirgimiz keledi. Bul azamat ózin bloger jáne BAQ ókili retinde tanystyrady. Ol óziniń jazbasynda antikorrýptsiialyq qyzmettiń qoǵamdyq tamaqtaný nysandarynyń birin 'qamqorlyqqa alǵany' týraly naqty senimmen málimdegen. Alaida ol jazbasynda da, sot otyrysynda da bul málimdemesin dáleldeitin naqty aiǵaq keltirmegen".
Bloger zań talaptaryn buzdy ma?
Vedomstvo ókilderi blogerdiń áreketin zań normalaryna qaishy dep baǵalaidy.
"Qazaqstan Respýblikasynyń 'Onlain-platformalar jáne onlain-jarnama týraly' zańynyń 17-babyna sáikes, blogerler de, ózge azamattar siiaqty, jariialaityn aqparattyń shynaiylyǵyn tekserýge mindetti. Sondyqtan bul azamattyń jariia qyzmeti jalǵan aqparat taratpaý jáne ózge tulǵalardyń quqyqtary men zańdy múddelerin saqtaý mindetin júkteidi".
Olar sonymen qatar blogerdiń Qazaqstanda sóz bostandyǵy joq degen málimdemesimen kelispeitinin bildirdi.
"Qazaqstanda pikir bildirýge erkindik beretin zańnamalyq baza qalyptasqan. Zań boiynsha kez kelgen azamatqa nemese memlekettik organǵa qatysty ar-namysy men qadir-qasietin qorlaityn nemese bedeline nuqsan keltiretin jalǵan málimet taratqan áreket úshin jaýapkershilik qarastyrylǵan. Sot sheshimi — Mańǵystaý oblystyq politsiia departamenti toltyrǵan ákimshilik hattama negizinde shyǵaryldy. Azamat Sársenbaevqa da óz málimdemesin dáleldeýge múmkindik berildi, biraq ol dálel keltirmedi. Sot bul málimetterdiń shyndyqqa janaspaitynyn anyqtady".
Advokattyń ýáji
Azamat Sársenbaevtyń advokaty Lada.kz tilshisine bergen túsiniktemesinde blogerdiń qazirgi tańda qamaýda ekenin rastady. Apelliatsiialyq shaǵym áli qaralǵan joq. Advokattyń aitýynsha, zań boiynsha QR ÁQBtK-niń 73-3-baby boiynsha (jala jabý) tek jeke tulǵalar ǵana aryzdana alady.
"Meniń qorǵaýymdaǵy azamat óz jazbasynda naqty tulǵalardy — aty-jónin atamaǵan, sondyqtan bul bappen isti qozǵaý zańǵa sáikes kelmeidi", – dedi qorǵaýshy.
Eske salaiyq
Aqtaýlyq bloger Azamat Sársenbaev Instagram jelisinde video úzindisin jariialaǵany úshin 20 táýlikke qamalǵan bolatyn.
