EKSPO-ǵa qatysty jańa urlyq isi tergelip jatyr, dep habarlaidy Dalanews.kz.
Qazaqstannyń bas prokýrory Berik Asylovtyń málimdeýinshe, sybailas jemqorlyqqa qarsy qyzmet EKSPO jobasyna qatysty jańa qylmystyq isti tergep jatyr. Qazirgi ýaqytta barlyq qatysýshylar men qarajattyń shetelge – ofshorlyq aimaqtarǵa shyǵarylǵanyn anyqtaý maqsatynda keshendi jedel-tergeý sharalary júrgizilýde.
Bul EKSPO-ǵa bailanysty birinshi qylmystyq is emes. Buǵan deiin osy ispettes qarjy jymqyrý faktileri boiynsha 23 adam sottalǵan bolatyn. Olardyń qatarynda "Astana EKSPO-2017" ulttyq kompaniiasynyń burynǵy basshysy Talǵat Ermegiiaev te bar. Ol 2016 jyly 14 jylǵa bas bostandyǵynan aiyrylyp, múlki tárkilengen.
Eske salaiyq, "Astana EKSPO-2017" kompaniiasynyń burynǵy top-menedjeri Murat Omarovtyń jýyrda bergen suhbaty qoǵamda úlken rezonans týdyrǵan bolatyn. Milliardtaǵan qarjy jymqyrylǵan atyshýly iske bailanysty ol tergeýdiń ádiletsiz ótkenin habarlaǵan edi. Keiingi ýaqytta túrli deńgeidegi burynǵy sheneýnikterdiń birinen soń biri osylaisha málimdeme jasai bastaýy — qoǵamda "aqtalý naýqany" júrip jatqandai áser qaldyrady.Osyǵan bailanysty Dalanews.kz tilshisi saiasattanýshy Dos Kóshimniń pikirin surap bilgen edi.
"Sheneýnikterdiń birinen soń biriniń aqtalýy – qalypty qubylys. Kez kelgen laýazymdy tulǵa ózine qatysty is qozǵalǵanda ne qylmystyq kúdik týyndaǵanda, ózin qorǵaýǵa tyrysady. Bul – jazadan qutylýdyń bir amaly ǵana jáne munda erekshe mán izdeýdiń qajeti joq.
Eń bastysy – jemqorlyqpen ainalysatyn joǵary laýazymdy tulǵalar týraly ashyq aitylmaidy. Qoǵamda jaýapkershilik kóbine tómengi deńgeidegi qyzmetkerlerge júkteledi, al olar óz kezeginde odan da tómendegilerge silteidi. Iaǵni, kinálilerdi shyn máninde jaýapqa tartý mehanizmi sol qalpynda ózgerissiz qalyp otyr", — deidi saiasattanýshy.
Dos Kóshimniń sózinshe, joǵarydaǵy saiasi elitalar arasynda aldyn ala kelisim mindetti túrde bolady.
