ەكسپو-عا قاتىستى جاڭا ۇرلىق ءىسى تەرگەلىپ جاتىر، دەپ حابارلايدى Dalanews.kz.
قازاقستاننىڭ باس پروكۋرورى بەرىك اسىلوۆتىڭ مالىمدەۋىنشە، سىبايلاس جەمقورلىققا قارسى قىزمەت ەكسپو جوباسىنا قاتىستى جاڭا قىلمىستىق ءىستى تەرگەپ جاتىر. قازىرگى ۋاقىتتا بارلىق قاتىسۋشىلار مەن قاراجاتتىڭ شەتەلگە – وفشورلىق ايماقتارعا شىعارىلعانىن انىقتاۋ ماقساتىندا كەشەندى جەدەل-تەرگەۋ شارالارى جۇرگىزىلۋدە.
بۇل ەكسپو-عا بايلانىستى ءبىرىنشى قىلمىستىق ءىس ەمەس. بۇعان دەيىن وسى ىسپەتتەس قارجى جىمقىرۋ فاكتىلەرى بويىنشا 23 ادام سوتتالعان بولاتىن. ولاردىڭ قاتارىندا "استانا ەكسپو-2017" ۇلتتىق كومپانياسىنىڭ بۇرىنعى باسشىسى تالعات ەرمەگيايەۆ تە بار. ول 2016 جىلى 14 جىلعا باس بوستاندىعىنان ايىرىلىپ، مۇلكى تاركىلەنگەن.
ەسكە سالايىق، "استانا ەكسپو-2017" كومپانياسىنىڭ بۇرىنعى توپ-مەنەدجەرى مۇرات وماروۆتىڭ جۋىردا بەرگەن سۇحباتى قوعامدا ۇلكەن رەزونانس تۋدىرعان بولاتىن. ميللياردتاعان قارجى جىمقىرىلعان اتىشۋلى ىسكە بايلانىستى ول تەرگەۋدىڭ ادىلەتسىز وتكەنىن حابارلاعان ەدى. كەيىنگى ۋاقىتتا ءتۇرلى دەڭگەيدەگى بۇرىنعى شەنەۋنىكتەردىڭ بىرىنەن سوڭ ءبىرى وسىلايشا مالىمدەمە جاساي باستاۋى — قوعامدا "اقتالۋ ناۋقانى" ءجۇرىپ جاتقانداي اسەر قالدىرادى.وسىعان بايلانىستى Dalanews.kz ءتىلشىسى ساياساتتانۋشى دوس كوشىمنىڭ پىكىرىن سۇراپ بىلگەن ەدى.
"شەنەۋنىكتەردىڭ بىرىنەن سوڭ ءبىرىنىڭ اقتالۋى – قالىپتى قۇبىلىس. كەز كەلگەن لاۋازىمدى تۇلعا وزىنە قاتىستى ءىس قوزعالعاندا نە قىلمىستىق كۇدىك تۋىنداعاندا، ءوزىن قورعاۋعا تىرىسادى. بۇل – جازادان قۇتىلۋدىڭ ءبىر امالى عانا جانە مۇندا ەرەكشە ءمان ىزدەۋدىڭ قاجەتى جوق.
ەڭ باستىسى – جەمقورلىقپەن اينالىساتىن جوعارى لاۋازىمدى تۇلعالار تۋرالى اشىق ايتىلمايدى. قوعامدا جاۋاپكەرشىلىك كوبىنە تومەنگى دەڭگەيدەگى قىزمەتكەرلەرگە جۇكتەلەدى، ال ولار ءوز كەزەگىندە ودان دا تومەندەگىلەرگە سىلتەيدى. ياعني، كىنالىلەردى شىن مانىندە جاۋاپقا تارتۋ مەحانيزمى سول قالپىندا وزگەرىسسىز قالىپ وتىر"، — دەيدى ساياساتتانۋشى.
دوس كوشىمنىڭ سوزىنشە، جوعارىداعى ساياسي ەليتالار اراسىندا الدىن الا كەلىسىم مىندەتتى تۇردە بولادى.
