Sý resýrstary jáne ırrıgasıa mınıstrligi Túrkistan oblysyndaǵy Ógem ózeninde GES kaskadymen birge toptyq sý qubyryn salý jobasyna jeke ınvestısıa tartty, – dep habarlaıdy Dalanews.kz
Joba aıasynda uzyndyǵy 12 shaqyrymdyq týnel qazý, uzyndyǵy 40 shaqyrym bolatyn sý qubyryn, sý jınaý qoımasyn jáne Qazyǵurt aýdanynyń Jańabazar aýylyndaǵy sý tazartý stansıasyn salý, sondaı-aq bes shaǵyn gıdroelektr stansıasynan turatyn kaskad salý kózdelgen.
Bul joba Túrkistan oblysynyń Saryaǵash, Keles, Qazyǵurt, Jetisaı jáne Maqtaaral aýdandaryn aýyz sýmen qamtamasyz etýge baǵyttalǵan. Jobanyń qýattylyǵy – jylyna 110 mln tekshe metr aýyz sý jáne saǵatyna 72 megavatt elektr energıasy. Bul óńirge qosymsha energetıkalyq qýat beredi.
«Mınıstrlik Qazaqstannyń sý sharýashylyǵyna jeke ınvestısıa tartý boıynsha belsendi jumys júrgizip jatyr. Jobany iske asyrý 600-den astam jumys ornyn ashýǵa múmkindik beredi, onyń ishinde 500-i ýaqytsha jáne 160-y turaqty jumys orny. Búginde jobanyń tehnıkalyq-ekonomıkalyq negizdemesi ázirlendi»,– dedi Sý resýrstary jáne ırrıgasıa vıse-mınıstri Erbolat Ibraıhanov.
