Ordabasy aýdanynda turǵyndardy gazben qamtý jumystary kezeń-kezeńimen júzege asýda. Búgin Shubar aýyldyq okrýgine qarasty Toqsansai, Bereke, Sarytoǵai aýyldarynda «kógildir otyn» berý rásimi ótti, – dep habarlaidy Dalanews.kz
Aýyl jurtyn qýantqan saltanatty rásimge aýdan ákimi Azat Oralbaev pen oblystyq máslihat depýtaty Dýlat Ábish arnaiy baryp turǵyndardy quttyqtady.
Aýdan basshysy jurtshylyqty quttyqtai otyryp, osy nátijeli jumystyń júzege asýyna oblys basshylyǵy men oblystyq máslihat depýtattarynyń úlken qoldaý kórsetkenin erekshe atap ótti. Oblystyq máslihat depýtaty Dýlat Ábish bul igilikti istiń Memleket basshysynyń tapsyrmasymen atqarylyp otyrǵanyn aityp, aýyl halqyna aqjarma lebizin arnady. Óz kezeginde aýyl jurty bul igilikke zor rizashylyǵyn bildirip, el úshin eńbek etip júrgen azamattarǵa aq batasyn berdi.
Aita ketsek, aýdan boiynsha 25 eldi-mekendi gazben qamtamasyz etý úshin memlekettik biýdjetten 2021 jyly tiisti qarjy qaralyp, qurylys jumystary bastalǵan. Sońǵy 2 jyl ishinde aýdan ákiminiń úilestirýi men baqylaýynyń nátijesinde aýdan turǵyndaryn tolyq tabiǵi gazben qamtamasyz etý baǵytynda naqty ári júieli jumystar atqaryldy. Nátijesinde qazirgi tańda aýdan boiynsha 57 eldi-mekenniń 36-sy tabiǵi gazǵa qosylyp, jalpy kórsetkish 2 jyldyń ishinde 15,7 paiyzdan 63,1 paiyzǵa ósip otyr.
Kelesi kezekte Shubarsý aýylyn gazben qamtý mindeti tur. Biyl aýylǵa gaz jetkizýshi qubyrdyń qurylysyna bastapqy qarjy qaralyp, jumystar bastalady. Odan bólek, basqa da eldi-mekenderde tiisti jumystar atqarylyp, 2 jyl kóleminde aýdanymyz tolyq gazben qamtylady dep kútilýde.
Endigi kezekte, tabiǵi gaz qosylǵan aýyl turǵyndary óz úilerine gaz qosý jumystaryn júrgizýi tiis. Aýdan basshysy aýyl orkrýgteriniń ákimdikterine bul jumystarǵa tiisti qoldaý kórsetýdi tapsyrdy.
