Memleket basshysy Qasym-Jomart Toqaev qatarlyq Al Jazeera telearnasyna bergen ekskliýziv suhbatynda elimizde júzege asyrylyp jatqan reformalar jaiyna toqtaldy, dep habarlaidy Dalanews.kz QazAqparatqa silteme jasap.
Al Jazeera: Osy aptada Astana halyqaralyq forýmy ótip jatyr. Bul — Qazaqstandy álemge tanytatyn is-sharanyń biri. Sizdiń reformalar baǵdarlamasyn jariia etkenińizge de 3 jyl boldy. Ózińiz ýáde etken jańa Qazaqstanǵa jete aldyńyzdar ma? Qalai oilaisyz?
— Biz senimdi túrde alǵa qadam basyp kelemiz. Protsess júrip jatyr. Degenmen biz reformalardy qolǵa alǵanda Qazaqstanda ǵana emes, álemde kóptegen oqiǵa oryn aldy.
Al Jazeera: Atap aitqanda, koronavirýs, Ýkrainadaǵy soǵys…
— Durys aitasyz. Menińshe, bul ońai dúnie emes. Biz ádil ári naqty iske umtylýymyz kerek. Sonymen qatar ózgeristerdi júzege asyrǵanda barlyq jaǵynan batyl qimyldaý qajet. Sondyqtan kún tártibindegi turǵan maqsattyń bárine qol jetkizý úshin barynsha tabandy áreket etken durys. Iá, reforma jalǵasyp jatyr. Onyń nátijesi de jetkilikti.
Al Jazeera: Sizdiń eldiń syrtqy saiasatyna nazar aýdaraiyqshy, Qazaqstan keibir sheteldik seriktestermen qarym-qatynasyn oi eleginen ótkizip, keibir saýda qatynasyn qaita qarap jatyr ma? Máselen, qandai da bir uly derjavaǵa táýeldi, tym jaqyn bolmaýy úshin Orta dáliz jobasyn jandandyrý degen sekildi…
— Birinshiden, biz syrtqy saiasatta qandai da bir reforma júrgizip jatyrmyz dei almaimyn. Óitkeni, bul — konservativti qubylys. Alaida Qazaqstannan tysqary jerde oryn alyp jatqan jaǵdailardy da qaperde ustaý qajet. Qazaqstan — Eýraziiadaǵy, ásirese Ortalyq Aziiadaǵy turaqtylyq pen qaýipsizdiktiń tiregi. Biz áýel bastan iri derjavalarmen, sonyń ishinde kórshilerimizben teńgerimdi saiasat júrgizip kelemiz jáne ulttyq maqsattarymyzdy da umyt qaldyrǵan emespiz. Sondyqtan syrtqy saiasattaǵy ustanymymyz ózgerdi demes edim.
Orta dáliz týraly eske salǵanyńyz da oryndy. Sebebi biz kólik qatynastaryn ártaraptandyrýǵa basymdyq beremiz. Osy turǵydan alǵanda, Transkaspii kólik baǵdarynyń mańyzy arta túsedi. Ózińiz biletindei, biz "Bir beldeý, bir jol" bastamasyn qoldaimyz. QHR Tóraǵasy Si Tszinpinniń 2013 jyly bul bastamany Qazaqstannyń elordasynda jariia etýi de beker emes.
Buǵan deiin Memleket basshysynyń osy suqbaty barysynda munai tasymaldaýdyń balama baǵyttaryna qatysty saýalǵa bergen jaýabyn jariialaǵan bolatynbyz. Sondai-aq Prezident Qazaqstannyń burynǵy biligi elitalaryna berilgen artyqshylyqtardy joiý jaiyna qatysty suraqqa da jaýap berdi.
