Kárim Másimovtiń burynǵy kúieý balasy retinde tanylǵan, «QazTemirTrans» AQ-nyń burynǵy vitse-prezidenti Azamat Qapenov Reseide syrttai qamaýǵa alyndy. Ol kásipker, «Aziia Avto – BIPEK» kompaniialar tobynyń burynǵy iesi Anatolii Balýshkindi aldady degen kúdikke ilingen, dep habarlaidy dalanews.kz.
Sot Azamat Qapenov pen Meder Qapenovke qatysty eki ai merzimge qamaýǵa alý týraly sheshim shyǵarǵan. Bul merzim olar naqty ustalǵan sátten nemese Reseige ekstraditsiialanǵan jaǵdaida quqyq qorǵaý organdaryna tapsyrylǵan kúnnen bastap esepteledi.
Tergeý nusqasyna sáikes, aǵaiyndy Qapenovtar Qazaqstanda tirkelgen «PTD» JShS-degi 25 paiyzdyq úlesti zańsyz iemdendi degen kúdikke alynǵan.
Is materialdarynda olardyń kompaniia qyzmetine qatysty daýlardy sheship beremiz degen syltaýmen Anatolii Balýshkindi jańylystyrǵany aitylǵan. Tergeý dereginshe, kúdiktiler óz yqpalyn alǵa tartyp, máseleni retteýge ýáde bergenimen, shyn máninde bul mindettemeni oryndaýdy kózdemegen bolýy múmkin.
Aldyn ala málimet boiynsha, kásipkerge keltirilgen materialdyq shyǵyn shamamen 52 million rýblge baǵalanyp otyr.
Aita keteiik, Anatolii Balýshkin buǵan deiin Qazaqstandaǵy iri avtokólik óndirýshilerdiń biri sanalatyn «Aziia Avto – BIPEK» kompaniialar tobynyń negizgi iesi bolǵan. Tergeý materialdarynda kásipker kompaniianyń ainalym qarajatyn tolyqtyrý úshin sol kezdegi «Tsesnabank» arqyly, qazirgi Jusan Bank, 66 mlrd teńge kóleminde nesie alǵany kórsetilgen.
Keiin bank bereshekti óndirip alý maqsatynda sotqa júgingen. Sot barysynda Balýshkin men onyń seriktesi Erik Saǵymbaevtyń nesie qarajatyn jymqyrǵany anyqtalǵany aityldy. Osydan keiin kásipkerdiń aktivteri buǵattalyp, kompaniialar tobyna qarasty kásiporyndardyń jumysy toqyraýǵa ushyraǵan.
