Ulttyq bank tóraǵasy Timýr Súleimenov Qazaqstan ekonomikasy aldaǵy ýaqytta tabiǵi resýrstarǵa jáne Ulttyq qorǵa arqa súiemei ómir súrýge úirenýi qajet ekenin málimdedi, dep habarlaidy Dalanews.kz.
Súleimenovtiń aitýynsha, Qazaqstandy Ortalyq Aziia elderinen erekshelendirip turǵan basty faktor – tabiǵi resýrstardyń moldyǵy. Aimaqtaǵy ózge elder mundai múmkindikke ie emes. Sondyqtan eldiń aqsha-kredit jáne fiskaldyq saiasaty, adami kapitaly men infraqurylymy osy resýrstardyń bar-joǵyna tikelei táýeldi.
"Munyń bári eńbek naryǵyna, jumys oryndarynyń sanyna tikelei áser etedi. Sonymen qatar, syrtqy faktorlardy da eskerý qajet. Iá, bizde Ulttyq qor jáne aitarlyqtai memlekettik rezerv bar, bul jaǵynan kórshi elderden erekshelenemiz. Biraq aldaǵy eń úlken syn – tabiǵi resýrstarǵa táýeldilikten bas tartý. Biz Ulttyq qor joq sekildi ómir súrýdi úirenýimiz kerek," – dedi ol.
Ulttyq bank basshysy ekonomikaǵa turaqty investitsiia quiylmaiynsha, júie álsireitinin aitty. Onyń pikirinshe, munai túsimine arqa súieý – uzaq merzimdi damý úshin qaýipti.
"Mysaly, kásibi sportshy únemi 'asteroid' qabyldap júrip, ony kenet toqtatsa – aýyryp qalýy múmkin. Ekonomika da sondai. Sondyqtan da sheshim qabyldaityn tulǵalar men memlekettik organdar munai túsimine táýeldilikten arylýǵa tyrysýy kerek. Bul baǵytta birqatar jetistikke jettik dep oilaimyn," – dedi Súleimenov.
Onyń aitýynsha, Qazaqstan Ulttyq qoryn saqtap qaldy, biraq ony rezerv retinde ustaý jetkiliksiz. Eń bastysy – munaidan tys tabys kózderin arttyrý. Bul úshin salyq júiesinde de ózgerister júrip jatyr.
"Biz qazir qosylǵan qun salyǵyn reformalap jatyrmyz. Iaǵni, biýdjetke túsetin kiristi munaidan tys kózder arqyly kóbeitýdi kózdeimiz. Taǵy da qaitalap aitamyn: biz Ulttyq qorymyz joqtai ómir súrýimiz kerek," – dep túiindedi Ulttyq bank tóraǵasy.
