"Atameken" Ulttyq kásipkerler palatasynyń burynǵy tóraǵasy, alaiaqtyq úshin sottalǵan Abylai Myrzahmetov shartty túrde merziminen buryn bosatý týraly óz ótinishin sottan qaitaryp aldy, dep habarlaidy Dalanews.kz.
Tengrinews.kz málimetinshe, Myrzahmetovtiń ótinishi Pavlodar oblystyq qylmystyq ister jónindegi mamandandyrylǵan aýdanaralyq sotqa 2 mamyrda kelip túsken. Qaraý merzimi 28 mamyrǵa belgilengen bolatyn. Alaida is sot otyrysyna deiin jetpei toqtatyldy.
"Material qaraýsyz qaldyryldy: sottalýshy aryz jazyp, ótinishin qaitaryp aldy", – dep naqtylady Pavlodar oblystyq sotynyń baspasóz qyzmeti.
Sottyń túsindirýinshe, shartty túrde merziminen buryn bosatýǵa quqyǵy bar sottalǵandar ár alty ai saiyn tiisti ótinish bere alady.
"Bul sottalýshy kelesi osyndai ótinishti keminde alty aidan keiin ǵana joldai alady. Alaida eger ol jaza túrin jeńilirekke aýystyrý týraly basqa ótinish bergisi kelse, muny erterek te jasaýyna bolady", – dedi sot ókilderi.
Qazirgi tańda Abylai Myrzahmetov Pavlodar oblysyndaǵy №46 túzetý mekemesinde jazasyn ótep jatyr. Osy kóktemde bul mekemede big-beg (úlken qaptar) tigetin shaǵyn tigin tsehy ashylǵan. Bul týraly buǵan deiin Bas prokýratýranyń Telegram-arnasy video jariialaǵan bolatyn.
Videoda Myrzahmetov koloniiada eńbek etip júrgenin aityp, byltyr qyrkúiekte basqa sottalǵandarmen birge shaǵyn óndiristi iske qosyp, investor tapqanyn jáne jarty jyldyń ishinde 120 jumys ornyn qurýǵa kómekteskenin baiandaidy. Koloniiada sporttyq kiimder, aǵash pen metalldan buiymdar jasalady. Qajetti qural-jabdyqtar men jumys oryndaryn kásipkerler qamtamasyz etken.
Pavlodar oblysy prokýratýrasynyń málimetinshe, birneshe tigin mashinasyn Myrzahmetov óz qarjysyna satyp alǵan. Qazir ol basqa sottalǵandarmen birge big-beg qaptaryn tigýmen ainalysady.
Eske salaiyq, Abylai Myrzahmetov asa iri kólemde alaiaqtyq jasaǵany úshin kináli dep tanylyp, 5 jylǵa bas bostandyǵynan aiyrylǵan bolatyn. Sonymen qatar, ol kásipkerdi qylmystyq jaýapkershilikten bosatýǵa kómek beremin dep para berýge itermeledi degen aiyppen de sottalǵan.
2025 jyldyń qańtarynda Myrzahmetov jazasynyń qalǵan bóligin bostandyǵyn shekteý jazasyna aýystyrý týraly ótinish bergen. Alaida sot bul ótinishti qanaǵattandyrmaǵan. Sebep – marapattar sany jetkiliksiz bolǵan. Sýdianyń aitýynsha, onyń bir ǵana yntalandyrýy bar bolǵan – adal eńbegi úshin, al bul zań boiynsha sottalýshynyń tikelei mindeti sanalady.
