"اتامەكەن" ۇلتتىق كاسىپكەرلەر پالاتاسىنىڭ بۇرىنعى ءتوراعاسى، الاياقتىق ءۇشىن سوتتالعان ابىلاي مىرزاحمەتوۆ شارتتى تۇردە مەرزىمىنەن بۇرىن بوساتۋ تۋرالى ءوز ءوتىنىشىن سوتتان قايتارىپ الدى، دەپ حابارلايدى Dalanews.kz.

Tengrinews.kz مالىمەتىنشە، مىرزاحمەتوۆتىڭ ءوتىنىشى پاۆلودار وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتقا 2 مامىردا كەلىپ تۇسكەن. قاراۋ مەرزىمى 28 مامىرعا بەلگىلەنگەن بولاتىن. الايدا ءىس سوت وتىرىسىنا دەيىن جەتپەي توقتاتىلدى.

"ماتەريال قاراۋسىز قالدىرىلدى: سوتتالۋشى ارىز جازىپ، ءوتىنىشىن قايتارىپ الدى"، – دەپ ناقتىلادى پاۆلودار وبلىستىق سوتىنىڭ باسپا ءسوز قىزمەتى.

سوتتىڭ تۇسىندىرۋىنشە، شارتتى تۇردە مەرزىمىنەن بۇرىن بوساتۋعا قۇقىعى بار سوتتالعاندار ءار التى اي سايىن ءتيىستى ءوتىنىش بەرە الادى.

"بۇل سوتتالۋشى كەلەسى وسىنداي ءوتىنىشتى كەمىندە التى ايدان كەيىن عانا جولداي الادى. الايدا ەگەر ول جازا ءتۇرىن جەڭىلىرەككە اۋىستىرۋ تۋرالى باسقا ءوتىنىش بەرگىسى كەلسە، مۇنى ەرتەرەك تە جاساۋىنا بولادى"، – دەدى سوت وكىلدەرى.

قازىرگى تاڭدا ابىلاي مىرزاحمەتوۆ پاۆلودار وبلىسىنداعى №46 تۇزەتۋ مەكەمەسىندە جازاسىن وتەپ جاتىر. وسى كوكتەمدە بۇل مەكەمەدە بيگ-بەگ (ۇلكەن قاپتار) تىگەتىن شاعىن تىگىن سەحى اشىلعان. بۇل تۋرالى بۇعان دەيىن باس پروكۋراتۋرانىڭ Telegram-ارناسى ۆيدەو جاريالاعان بولاتىن.

ۆيدەودا مىرزاحمەتوۆ كولونيادا ەڭبەك ەتىپ جۇرگەنىن ايتىپ، بىلتىر قىركۇيەكتە باسقا سوتتالعاندارمەن بىرگە شاعىن ءوندىرىستى ىسكە قوسىپ، ينۆەستور تاپقانىن جانە جارتى جىلدىڭ ىشىندە 120 جۇمىس ورنىن قۇرۋعا كومەكتەسكەنىن باياندايدى. كولونيادا سپورتتىق كيىمدەر، اعاش پەن مەتاللدان بۇيىمدار جاسالادى. قاجەتتى قۇرال-جابدىقتار مەن جۇمىس ورىندارىن كاسىپكەرلەر قامتاماسىز ەتكەن.

پاۆلودار وبلىسى پروكۋراتۋراسىنىڭ مالىمەتىنشە، بىرنەشە تىگىن ماشيناسىن مىرزاحمەتوۆ ءوز قارجىسىنا ساتىپ العان. ءقازىر ول باسقا سوتتالعاندارمەن بىرگە بيگ-بەگ قاپتارىن تىگۋمەن اينالىسادى.

ەسكە سالايىق، ابىلاي مىرزاحمەتوۆ اسا ءىرى كولەمدە الاياقتىق جاساعانى ءۇشىن كىنالى دەپ تانىلىپ، 5 جىلعا باس بوستاندىعىنان ايىرىلعان بولاتىن. سونىمەن قاتار، ول كاسىپكەردى قىلمىستىق جاۋاپكەرشىلىكتەن بوساتۋعا كومەك بەرەمىن دەپ پارا بەرۋگە يتەرمەلەدى دەگەن ايىپپەن دە سوتتالعان.

2025 جىلدىڭ قاڭتارىندا مىرزاحمەتوۆ جازاسىنىڭ قالعان بولىگىن بوستاندىعىن شەكتەۋ جازاسىنا اۋىستىرۋ تۋرالى ءوتىنىش بەرگەن. الايدا سوت بۇل ءوتىنىشتى قاناعاتتاندىرماعان. سەبەپ – ماراپاتتار سانى جەتكىلىكسىز بولعان. سۋديانىڭ ايتۋىنشا، ونىڭ ءبىر عانا ىنتالاندىرۋى بار بولعان – ادال ەڭبەگى ءۇشىن، ال بۇل زاڭ بويىنشا سوتتالۋشىنىڭ تىكەلەي مىندەتى سانالادى.