Bolat Nazarbaevtyń taǵy bir áieli Dinara Kemelhan muragerlikke talasty, dep habarlaidy Dalanews.kz.
Bul týraly zańger Anna Chernova habarlady. Onyń aitýynsha, oǵan marqum Bolat Nazarbaevtyń jary Dinara Kemelhan kómek surap júgingen. Ol bul ótinishti kámelet jasyna tolmaǵan balalarynyń múddesin qorǵaý maqsatynda jasapty.
Chernovanyń sózinshe, Dinara Kemelhan marqum jubaiynyń sońǵy jyldardaǵy jaǵdaiy, onyń uzaq ýaqyt boiy naýqas bolyp, tósekke tańylǵany jaiynda egjei-tegjeili baiandaǵan. Alaida zańgerdiń sózinshe, erekshe nazar aýdaratyn jait — qazirgi tańda muragerlik múlikti úlken ulynyń qalai bólip jatqany týraly aqparat.
Dinara Kemelhan bul máseleni beibit jolmen sheship, óz úlesiniń bir bóligin "Qazaq halqyna" qoryna aýdarýdy usynǵanyn, biraq Nazarbaevtyń uly bul usynystan bas tartqanyn aitqan.
Anna Chernovanyń aitýynsha, bul baǵytta quqyqtyq jumystar jalǵasady. Sonymen qatar Dinara Kemelhan kópshilikpen bólisý úshin oqiǵanyń mán-jaiyn beinejazba túrinde daiyndap jatyr.
Buǵan deiin DALA INSIDE Nursultan Nazarbaevtyń ómirden qaitqan inisi, "eń bai santehnik" atanǵan Bolat Nazarbaevtyń murasy úshin tartys sheshýshi fazasyna jetkenin jazǵan bolatyn. Arenaǵa kútpegen jerden dástúrli ánshi Dinara Kemelhan (Mámetekova) shyǵyp otyr.
"Bolat Nazarbaevtyń úlken uldary onyń azamattyq nekede júrgen áieli Dinara Mámetekovamen zańdy nekege otyrýyna qarsy bolǵan edi. Sebebi, Bolattyń densaýlyǵy nasharlaǵandyqtan, olar da, áýlettiń basym bóligi de muraǵa ortaqtasatyn artyq adam qajet emes dep oilady. Endi olar "Dinara Mámetekova Bolat Nazarbaevtyń uzaq ómir súrmesin bildi jáne ádeii nekeni zańdastyrýǵa asyqty" dep sanaidy", - deidi, DALA INSIDE derekkózi.
Notariýsqa baryp, muragerlik quqyǵyn jariialaǵandar tizimde Bolat Nazarbaevtyń kóz jumǵan sátindegi zańdy áieli Dinara Mámetekova men 14 balasy bar. Ótinishter birlesip satyp alynǵan múliktiń úlesine de, zań boiynsha muranyń mindetti úlesterine de qatysty.
"Bolat Nazarbaev óziniń ósiethatyn alǵash ret 2014 jyly jazyp, onda barlyq múlkin úlken uly Nurboldyń atyna tabystaǵan. Alaida, zańda erli-zaiyptylardyń ortaq múlkine qatysty bap bar. Sondyqtan zańdy áieli ortaq múlikke talasa alady", - deidi, derekkóz.
Bolat Nazarbaev murasynyń eń qomaqty bóligine Nurbol Nazarbaev ie bolyp otyr. "Jańa Qazaqstan" da biraz aktivtiń kezinde zańsyz qoldy bolǵanyn dáleldep, qazir ózine qaitarý protsesin júrgizýde. Sondyqtan qalǵan muragerlerdiń kóp bolsa bir jer telimi, ne úige qanaǵat etýi ǵajap emes.
