Shyǵys Qazaqstan oblysynyń ákimi Nurymbet Saqtaǵanov Úlken Naryn aýylyna jumys sapary barysynda óńirde, sonyń ishinde aýdan ortalyqtary men aýyldarda týrizmdi damytýda jol boiy servisi mańyzdy ról atqaratynyn atap ótti, – dep habarlaidy Dalanews.kz
Mańyzdy qadamdardyń biri retinde Úlken Naryn aýdany ákimdigi men «QazAvtoJol» AQ birlesken jobasy aiasynda jol boiy servistik nysannyń ashylýyn aitýǵa bolady. Bul joba aýdan infraqurylymyn jaqsartýǵa, týrizmdi damytýǵa qosymsha múmkindikter jasaýǵa baǵyttalǵan.
Sonymen qatar, jańa jumys oryndaryn ashý jáne jergilikti kásipkerlerdi qoldaý kózdelýde.
«Týrizmdi damytý úshin eń aldymen jol, infraqurylym jáne jol boiy servistik qyzmetter qajet. Ótken jyly oblys boiynsha 710 shaqyrym jol jóndeldi, biyl taǵy 870 shaqyrym joldy jóndeýdi josparlap otyrmyz. Jergilikti atqarýshy organdar jol boiy servistik nysandarǵa elektr qýaty, aýyz sý, káriz júiesin jetkizedi, al "QazAvtoJol" aialdap, demalyp, shai, kofe ishýge bolatyn pavilon keshenderin ornatady», – dedi oblys ákimi.
Jol boiy servistik keshende túrli kofe túrleri men qospalary usynylatyn ekspress-kafe, dástúrli retsept boiynsha daiyndalǵan balǵyn nan-toqashtar, azyq-túlik pen kúndelikti qajetti taýarlar dúkeni bar.
Budan bólek, keshende múmkindigi shekteýli jandarǵa arnalǵan sanitarlyq aimaqtary bar kóp oryndy ájethanalar, ana men bala bólmesi jáne namaz oqýǵa arnalǵan arnaiy bólme qarastyrylǵan.
Ákimniń aitýynsha, osyndai jol boiy servistik keshender oblystyń basqa da joldarynda, shamamen árbir 50–60 shaqyrym saiyn ornatylatyn bolady.
