Májiliste Ishki ister ministrliginiń niqabqa tyiym salý týraly bastamasy qaralyp jatyr. Bul týraly Mádeniet jáne aqparat ministri Aida Balaeva málimdedi, dep habarlaidy Dalanews.kz.
Aida Balaevanyń aitýynsha, bul jóninde arnaiy zań joq, biraq másele talqylaný ústinde.
“Men naqty aityp ótkim keledi: bul boiynsha jeke zań joq. Biraq Ishki ister ministrligi tarapynan ázirlengen norma bar. Ol niqab kiiýge tyiym salýdy kózdeidi. Qazir bul norma májiliste. Májiliste óz tártibi bar, meniń bilýimshe, birinshi oqylymda talqylanyp jatyr nemese talqylanyp qoiǵan”, – dedi ministr.
Eske salaiyq, buǵan deiin prezident Qasym-Jomart Toqaev Ulttyq quryltaida tól mádenietimizdegi Áz-Naýryz meiramynyń orny týraly aityp, kiim úlgisine ulttyq reńk berý ideiany qoldaǵan edi. Munda ol bet-júzdi tutastai jaýyp turatyn qara kiimderden góri, ulttyq naqyshtaǵy kiim kigen durys ekenin aitqan.
“Naýryznamadaǵy “Ulttyq kiim kúni”qoǵamnyń zor qoldaýyna ie boldy. Ulttyq kiimderge degen qyzyǵýshylyq arta tústi. Mektepterde, túrli mekemelerde, sondai-aq, iri kompaniialarda ulttyq kiimge mán berile bastady. Suranysqa sai tigin tsehtary ashylyp, jańa brendter, dúkender paida boldy. Osylaisha, ulttyq kiim kiiý birtindep qalypty kóriniske ainalyp keledi. Bul – óte jaqsy úrdis.
Bet-júzdi tumshalaityn qara kiimnen góri ózimizdiń ulttyq kiimderimiz áldeqaida artyq. Ásirese, áielderdiń dástúrli kiimi óte ǵajap kórinedi. Sebebi ulttyq kiim bul – bizdiń biregei ulttyq bolmysymyzdyń mańyzdy kórinisi. Ony jan-jaqty dáripteýimiz kerek", - dedi prezident.
