ماجىلىستە ىشكى ىستەر مينيسترلىگىنىڭ نيقابقا تىيىم سالۋ تۋرالى باستاماسى قارالىپ جاتىر. بۇل تۋرالى مادەنيەت جانە اقپارات ءمينيسترى ايدا بالايەۆا مالىمدەدى، دەپ حابارلايدى Dalanews.kz.
ايدا بالايەۆانىڭ ايتۋىنشا، بۇل جونىندە ارنايى زاڭ جوق، ءبىراق ماسەلە تالقىلانۋ ۇستىندە.
“مەن ناقتى ايتىپ وتكىم كەلەدى: بۇل بويىنشا جەكە زاڭ جوق. ءبىراق ىشكى ىستەر مينيسترلىگى تاراپىنان ازىرلەنگەن نورما بار. ول نيقاب كيۋگە تىيىم سالۋدى كوزدەيدى. ءقازىر بۇل نورما ماجىلىستە. ماجىلىستە ءوز ءتارتىبى بار، مەنىڭ بىلۋىمشە، ءبىرىنشى وقىلىمدا تالقىلانىپ جاتىر نەمەسە تالقىلانىپ قويعان”، – دەدى مينيستر.
ەسكە سالايىق، بۇعان دەيىن پرەزيدەنت قاسىم-جومارت توقايەۆ ۇلتتىق قۇرىلتايدا ءتول مادەنيەتىمىزدەگى ءاز-ناۋرىز مەيرامىنىڭ ورنى تۋرالى ايتىپ، كيىم ۇلگىسىنە ۇلتتىق رەڭك بەرۋ يدەيانى قولداعان ەدى. مۇندا ول بەت-جۇزدى تۇتاستاي جاۋىپ تۇراتىن قارا كيىمدەردەن گورى، ۇلتتىق ناقىشتاعى كيىم كيگەن دۇرىس ەكەنىن ايتقان.
“ناۋرىزناماداعى “ۇلتتىق كيىم كۇنى”قوعامنىڭ زور قولداۋىنا يە بولدى. ۇلتتىق كيىمدەرگە دەگەن قىزىعۋشىلىق ارتا ءتۇستى. مەكتەپتەردە، ءتۇرلى مەكەمەلەردە، سونداي-اق، ءىرى كومپانيالاردا ۇلتتىق كيىمگە ءمان بەرىلە باستادى. سۇرانىسقا ساي تىگىن سەحتارى اشىلىپ، جاڭا برەندتەر، دۇكەندەر پايدا بولدى. وسىلايشا، ۇلتتىق كيىم كيۋ بىرتىندەپ قالىپتى كورىنىسكە اينالىپ كەلەدى. بۇل – وتە جاقسى ءۇردىس.
بەت-جۇزدى تۇمشالايتىن قارا كيىمنەن گورى ءوزىمىزدىڭ ۇلتتىق كيىمدەرىمىز الدەقايدا ارتىق. اسىرەسە، ايەلدەردىڭ ءداستۇرلى كيىمى وتە عاجاپ كورىنەدى. سەبەبى ۇلتتىق كيىم بۇل – ءبىزدىڭ بىرەگەي ۇلتتىق بولمىسىمىزدىڭ ماڭىزدى كورىنىسى. ونى جان-جاقتى دارىپتەۋىمىز كەرەك"، - دەدى پرەزيدەنت.
