Bostondaǵy federaldy sot AQSH prezıdenti Donald Tramp ákimshiliginiń Garvard ýnıversıtetine sheteldik stýdentterdi qabyldaýǵa tyıym salý jónindegi sheshimin toqtatty, dep habarlaıdy Dalanews.kz.
Atalǵan sheshimdi 29 mamyr kúni eks-prezıdent Barak Obama taǵaıyndaǵan sýdıa Ellıson Berroýz qabyldap, bul qadam "qalyptasqan jaǵdaıdy saqtaýǵa" sep bolatynyn atap ótti. Degenmen is boıynsha túpkilikti sheshim ázirge shyǵarylǵan joq.
Osylaısha, Aq úı Garvardtyń sheteldik stýdentterdi qabyldap, almasý baǵdarlamalaryna qatysýyna múmkindik beretin arnaıy sertıfıkatyn joıýǵa qaýqarsyz bolyp otyr. Bul qujat İshki qaýipsizdik mınıstri Krıstı Noemniń ýnıversıtetti "zorlyq-zombylyqty nasıhattady, antısemıttik áreketterge jol berdi jáne Qytaıdyń Komýnıstik partıasymen astyrtyn baılanys ornatty" dep aıyptaýynan keıin qaýip tóndirgen edi.
Bul aıyptaýlarǵa jaýap retinde Garvard ýnıversıteti Tramp ákimshiligin federaldy sotqa berip, sheteldik stýdentterge tyıym salýdy alyp tastaýdy talap etti. Nátıjesinde sýdıa Berroýz atalǵan sertıfıkatty joıýǵa ýaqytsha tyıym saldy.
Sonymen qatar Politico basylymynyń habarlaýynsha, Tramp ákimshiligi AQSH-qa kelýdi josparlaǵan sheteldik stýdentter úshin jańa vızalyq suhbattardy ýaqytsha toqtatýdy kózdep otyr. Buǵan qosa, vıza alýshylardyń áleýmettik jelilerindegi belsendiligine tereńirek taldaý jasaý usynylýda. Memlekettik hatshy Marko Rýbıo qol qoıǵan telegramma bul baǵyttaǵy baqylaýdyń kúsheıe túsýi múmkin ekenin ańǵartady.
