Qazaqstanda týý kórsetkishiniń tómendeýi aldaǵy jyldary jalǵasyp, bul úrdis eldiń eńbek naryǵyna, bilim berý men meditsina salalaryna aitarlyqtai yqpal etýi múmkin. Alvin Market zertteý agenttiginiń sarapshylary osyndai qorytyndyǵa kelgen, dep habarlaidy Dalanews.kz.
Agenttik málimetinshe, aldaǵy 5–10 jylda bastaýysh mektepterdegi oqýshylar sany azaiyp, bul jekemenshik balabaqshalar men mektepterdiń tolyq júktelmeýine ákelýi múmkin. Sonymen qatar, balalar taýarlary naryǵy da qysymǵa ushyraidy. Meditsinada pediatriialyq qyzmetterge suranys tómendep, kerisinshe, reprodýktivti densaýlyq saqtaý salasyna degen qajettilik arta túsedi.
Uzaq merzimdi perspektivada jumysqa qabiletti halyqtyń azaiýy eńbek resýrstarynyń tapshylyǵyna, jalaqy qorynyń qysymǵa ushyraýyna jáne óndiristi avtomattandyrý úderisiniń kúsheiýine alyp keledi. Sarapshylar bul qubylysty Qazaqstannyń "kúmis ekonomikaǵa" — iaǵni egde jastaǵy turǵyndardyń úlesi basym qoǵamǵa kóshýimen bailanystyrady.
Alvin Market sarapshylarynyń pikirinshe, bul máselege qarsy turý úshin elge jańa, zamanaýi otbasylyq saiasat qajet. Atap aitqanda, qoljetimdi turǵyn úimen qamtamasyz etý, jumys isteitin ata-analardy qoldaý jáne bala kútimi boiynsha infraqurylymdy damytý — basty mindetterdiń biri bolýy tiis.
Týý kórsetkishiniń tómendeýiniń 7 negizgi sebebi:
Demografiialyq jańǵyrý úzilisi
Qazir bala týý jasyna 1990-jyldardaǵy daǵdarys kezeńinde týǵan adamdar kelip jetti. Ol jyldary týylǵandar sany az bolǵandyqtan, ata-ana bolýǵa qabiletti áielder men erler de az.
Eńbek naryǵyndaǵy turaqsyzdyq
Turaqty tabystyń bolmaýy balalarǵa investitsiia jasaýdy táýekelge ainaldyrady.
Mamandardyń elden ketýi
Reprodýktivti jastaǵy áielder, IT salasynyń mamandary men kreativti indýstriia ókilderi shetelge qonys aýdarýda.
Bala súiýdi keiinge shegerý
Jas otbasylar arasynda birinshi balany bosaný jasy uzarýda, al keibiri otbasynda bala sanyn ádeii shekteidi.
Nekeniń azaiýy jáne ajyrasýdyń kóbeiýi
2013 jyldan beri elde nekege turýshylar sany azaiyp, ajyrasý kórsetkishi aitarlyqtai artqan.
Alǵashqy ana bolý jasynyń ulǵaiýy
Áielderdiń alǵash ret bala týý jasy jyldan-jylǵa keshigýde.
Reprodýktivti densaýlyqtyń nasharlaýy
Bedeýlik derekteri kóbeiip, kóptegen otbasy meditsinalyq kómekke júginýge májbúr.
