2025 jyldyń 27-28 naýryz kúnderi Túrkistan qalasynda Bilim mazmunyn damytý ınstıtýtynyń uıymdastyrýymen halyqaralyq pedagogıkalyq samıt ótti. Jıynnyń basty taqyryby – Júsipbek Aımaýytulynyń pedagogıkalyq murasy jáne N.A. Orazahynovanyń «Satylaı keshendi oqytý» tehnologıasynyń jańashyldyǵy boldy, dep habarlaıdy Dalanews.kz
Halyqaralyq jıyndy pedagogıka ǵylymdarynyń doktory, profesor, Reseı Jaratylystaný ǵylymdar akademıasynyń korespondent-múshesi, QR Kishi ǵylym akademıasynyń vıse-prezıdenti ári «Satylaı keshendi oqytý» tehnologıasynyń negizin qalaýshy Nursha Aljanbaıqyzy Orazahynova ashty. Óz sózinde ol HH ǵasyrdaǵy kórnekti pedagog, psıholog Júsipbek Aımaýytulynyń búgingi bilim júıesindegi róli men mańyzyn atap ótip, dástúrli pedagogıka men zamanaýı bilim berý tehnologıalaryn úılestirýdiń múmkindikterine toqtaldy.
Samıt aıasynda 28 naýryz kúni «Tilim meniń – tirligimniń aıǵaǵy» taqyrybynda aýyzsha komandalyq olımpıada ótti. Bul bilim saıysy oqýshylardyń jalpy pánder boıynsha básekelesý qabiletin damytý, daryndy balalardyń ǵylymı-tanymdyq belsendiligin arttyrý jáne ulttyq qundylyqtardy dáripteý maqsatynda uıymdastyryldy. Olımpıada tórt kezeńnen turdy: mektepishilik, oblystyq (qalalyq), respýblıkalyq jáne halyqaralyq kezeńder. Olımpıadaǵa elimizdiń ár óńirinen – Almaty, Astana qalalary, Pavlodar, Atyraý, Túrkistan oblystary, sondaı-aq Qyrǵyzstan men Mońǵolıadan 101 oqýshy men 57 jetekshi qatysty.
Qazylar alqasy qatysýshylardyń bilimin baǵalaý barysynda olardyń ǵylymı negizde baıandaý sheberligine, pán mazmunyn ashý qabiletine, teorıalyq materıaldy praktıkalyq turǵydan taldaý daǵdysyna, qazaq halqynyń klasık aqyndary men jazýshylarynyń shyǵarmalaryn mánerlep oqýyna jáne óz kózqarasyn sheshendikpen jetkize bilýine erekshe nazar aýdardy.
Olımpıada nátıjesinde komandalyq jarysta Bas júldeni Mońǵolıadan kelgen «Atameken» toby men Qyrǵyzstannan kelgen «Ýmtýl» toby jeńip aldy. Birinshi oryndy Astana qalasynyń, ekinshi oryndy Almaty qalasynyń, úshinshi oryndy Túrkistan qalasynyń komandalary ıelendi. Sonymen qatar, İ dárejeli dıplommen – 35 oqýshy, İİ dárejeli dıplommen – 26 oqýshy, İİİ dárejeli dıplommen – 23 oqýshy, al gramotamen – 17 oqýshy marapattaldy. Jeńimpazdarǵa marapattaryn Bilim mazmunyn damytý ınstıtýtynyń dırektory Raqymberdi Jetibaı tabystady.
Raqymberdi Jetibaı sóz kezeginde jeńimpazdar men qatysýshylardy quttyqtap, is-sharanyń mańyzdylyǵyna toqtaldy:
«Bul olımpıada – bilim men ulttyq qundylyqtardyń toǵysatyn alańy. Oqýshylar tek bilim jarysyna qatysyp qana qoımaı, óz mádenıeti men dástúrin qurmetteýdi, ony tereń túsinýdi úırenedi. Mundaı mańyzdy is-sharalar jas urpaqtyń sanaly, jan-jaqty ári bilimdi bolyp qalyptasýyna zor yqpal etedi».
Halyqaralyq samıt dástúrli pedagogıka men ınovasıalyq bilim berý tehnologıalaryn biriktirýge arnalǵan mańyzdy alań boldy. Oqýshylardyń ǵylymı-tanymdyq belsendiligin arttyryp, ulttyq qundylyqtardy dáriptegen bul is-shara bilim salasyna tyń serpin berdi.
