Búgin Abai oblysynda jol qurylysy maýsymy resmi túrde ashyldy. Halyqaralyq mańyzǵa ie «Qalbataý-Maiqapshaǵai» avtojolynyń boiynda ótken sharaǵa oblys ákimi Berik Ýáli, «QazAvtoJol» Ulttyq kompaniiasy» AQ basqarma tóraǵasy Darhan Imanashev qatysty, - dep habarlaidy Dalanews.kz
Jalpy uzyndyǵy 415 shaqyrymdy quraityn avtojoldyń 184 shaqyrymy oblys aýmaǵynan ótedi. «QazAvtoJol» Ulttyq kompaniiasy» AQ basqarma tóraǵasy Darhan Imanashevtiń aitýynsha, «Qalbataý-Maiqapshaǵai» kúre jolynda jol qozǵalysy jyl sońyna deiin ashylady. Joba aiasynda 16 kópir men 100-den astam sý ótkizý qurylǵylary jańartylady.
«Abai oblysyndaǵy respýblikalyq mańyzy bar joldardyń uzyndyǵy 2176 shaqyrymdy quraidy. Biyl bizdiń kompaniia óńirdegi uzyndyǵy 830 shaqyrymǵa qurylys jumystaryn júrgizedi. 250 shaqyrym jolǵa asfalt tóseledi. Al «Qalbataý-Maiqapshaǵai» avtojolynda jyl aiaǵyna deiin jol qozǵalysyn ashýdy josparlap otyrmyz. Merdiger uiym daiyn, qarjy tolyq qarastyrylǵan. Bul — bárimizge ortaq jumys. Jergilikti ákimdik tarapynan tiisti qoldaý kórsetilýde», - dedi Darhan Imanashev.
Oblys ákimi sharanyń ashylýynda sóilegen sózinde «Qalbataý-Maiqapshaǵai» jolynyń óńir úshin ekonomikalyq turǵydan ǵana emes, áleýmettik turǵydan da mańyzdy ekenin atap ótti. Byltyr oblysta 250 shaqyrym jol jóndelgen. Aimaq basshysy biyl bul kórsetkishtiń edáýir ulǵaiatynyn aitty.
"Búgingi shara oblystaǵy jol jóndeý maýsymynyń bastalýymen de tuspa-tus kelip otyr. Biyl óńirimizde jalpy uzyndyǵy 400 shaqyrym jergilikti mańyzy bar avtomobil joldary men eldi mekenderdiń kóshelerine asfalt tóseý josparlanyp otyr.
Munyń ishinde oblystyq mańyzy bar joldar da, aýdandyq mańyzy bar joldar da bar. Budan bólek «Aýyl – el besigi» baǵdarlamasy aiasynda eldi mekenderdegi 64 shaqyrym kóshe joldary ortasha jóndeýden ótedi. Maqanshy aýyly men Aiagóz qalasyndaǵy kóshe joldaryn jóndeýge oblystyq biýdjetten qosymsha qarjy bólindi», – dedi aimaq basshysy.
«QazAvtoJol» ulttyq kompaniiasynyń» habarlaýynsha, «Óskemen-Taldyqorǵan» avtojolynyń qurylysy aiaqtalǵan. Qazirgi ýaqytta abattandyrý jumysy júrgizilýde. Budan bólek «Semei-Qainar», «Semei-Resei Federatsiiasy shekarasy», «Qaraǵandy-Aiagóz-Tarbaǵatai-Boǵas», «Óskemen-Semei», «Taskesken-Baqty» baǵytyndaǵy joldarǵa asfalt tóseledi.
Oblys ákimi Berik Ýáli «QazAvtoJol» Ulttyq kompaniiasy» AQ basqarma tóraǵasy Darhan Imanashevpen birge rekonstrýktsiialaý jumysy bastalǵan aýmaqty aralap kórdi. Jol qurylysyn júrgizip jatqan merdiger kompaniianyń óndiristik bazasynda bolyp, jumysshylarmen kezdesti.
