بٷگٸن اباي وبلىسىندا جول قۇرىلىسى ماۋسىمى رەسمي تٷردە اشىلدى. حالىقارالىق ماڭىزعا يە «قالباتاۋ-مايقاپشاعاي» اۆتوجولىنىڭ بويىندا ٶتكەن شاراعا وبلىس ەكٸمٸ بەرٸك ۋەلي, «قازاۆتوجول» ۇلتتىق كومپانيياسى» اق باسقارما تٶراعاسى دارحان يماناشەۆ قاتىستى, - دەپ حابارلايدى Dalanews.kz
جالپى ۇزىندىعى 415 شاقىرىمدى قۇرايتىن اۆتوجولدىڭ 184 شاقىرىمى وبلىس اۋماعىنان ٶتەدٸ. «قازاۆتوجول» ۇلتتىق كومپانيياسى» اق باسقارما تٶراعاسى دارحان يماناشەۆتٸڭ ايتۋىنشا, «قالباتاۋ-مايقاپشاعاي» كٷرە جولىندا جول قوزعالىسى جىل سوڭىنا دەيٸن اشىلادى. جوبا اياسىندا 16 كٶپٸر مەن 100-دەن استام سۋ ٶتكٸزۋ قۇرىلعىلارى جاڭارتىلادى.
«اباي وبلىسىنداعى رەسپۋبليكالىق ماڭىزى بار جولداردىڭ ۇزىندىعى 2176 شاقىرىمدى قۇرايدى. بيىل بٸزدٸڭ كومپانييا ٶڭٸردەگٸ ۇزىندىعى 830 شاقىرىمعا قۇرىلىس جۇمىستارىن جٷرگٸزەدٸ. 250 شاقىرىم جولعا اسفالت تٶسەلەدٸ. ال «قالباتاۋ-مايقاپشاعاي» اۆتوجولىندا جىل اياعىنا دەيٸن جول قوزعالىسىن اشۋدى جوسپارلاپ وتىرمىز. مەردٸگەر ۇيىم دايىن, قارجى تولىق قاراستىرىلعان. بۇل — بەرٸمٸزگە ورتاق جۇمىس. جەرگٸلٸكتٸ ەكٸمدٸك تاراپىنان تيٸستٸ قولداۋ كٶرسەتٸلۋدە», - دەدٸ دارحان يماناشەۆ.
وبلىس ەكٸمٸ شارانىڭ اشىلۋىندا سٶيلەگەن سٶزٸندە «قالباتاۋ-مايقاپشاعاي» جولىنىڭ ٶڭٸر ٷشٸن ەكونوميكالىق تۇرعىدان عانا ەمەس, ەلەۋمەتتٸك تۇرعىدان دا ماڭىزدى ەكەنٸن اتاپ ٶتتٸ. بىلتىر وبلىستا 250 شاقىرىم جول جٶندەلگەن. ايماق باسشىسى بيىل بۇل كٶرسەتكٸشتٸڭ ەدەۋٸر ۇلعاياتىنىن ايتتى.
"بٷگٸنگٸ شارا وبلىستاعى جول جٶندەۋ ماۋسىمىنىڭ باستالۋىمەن دە تۇسپا-تۇس كەلٸپ وتىر. بيىل ٶڭٸرٸمٸزدە جالپى ۇزىندىعى 400 شاقىرىم جەرگٸلٸكتٸ ماڭىزى بار اۆتوموبيل جولدارى مەن ەلدٸ مەكەندەردٸڭ كٶشەلەرٸنە اسفالت تٶسەۋ جوسپارلانىپ وتىر.
مۇنىڭ ٸشٸندە وبلىستىق ماڭىزى بار جولدار دا, اۋداندىق ماڭىزى بار جولدار دا بار. بۇدان بٶلەك «اۋىل – ەل بەسٸگٸ» باعدارلاماسى اياسىندا ەلدٸ مەكەندەردەگٸ 64 شاقىرىم كٶشە جولدارى ورتاشا جٶندەۋدەن ٶتەدٸ. ماقانشى اۋىلى مەن اياگٶز قالاسىنداعى كٶشە جولدارىن جٶندەۋگە وبلىستىق بيۋدجەتتەن قوسىمشا قارجى بٶلٸندٸ», – دەدٸ ايماق باسشىسى.
«قازاۆتوجول» ۇلتتىق كومپانيياسىنىڭ» حابارلاۋىنشا, «ٶسكەمەن-تالدىقورعان» اۆتوجولىنىڭ قۇرىلىسى اياقتالعان. قازٸرگٸ ۋاقىتتا اباتتاندىرۋ جۇمىسى جٷرگٸزٸلۋدە. بۇدان بٶلەك «سەمەي-قاينار», «سەمەي-رەسەي فەدەراتسيياسى شەكاراسى», «قاراعاندى-اياگٶز-تارباعاتاي-بوعاس», «ٶسكەمەن-سەمەي», «تاسكەسكەن-باقتى» باعىتىنداعى جولدارعا اسفالت تٶسەلەدٸ.
وبلىس ەكٸمٸ بەرٸك ۋەلي «قازاۆتوجول» ۇلتتىق كومپانيياسى» اق باسقارما تٶراعاسى دارحان يماناشەۆپەن بٸرگە رەكونسترۋكتسييالاۋ جۇمىسى باستالعان اۋماقتى ارالاپ كٶردٸ. جول قۇرىلىسىن جٷرگٸزٸپ جاتقان مەردٸگەر كومپانييانىڭ ٶندٸرٸستٸك بازاسىندا بولىپ, جۇمىسشىلارمەن كەزدەستٸ.
