Qazaqstan fýtbol federatsiiasynyń prezidenti Marat Omarov balalar fýtbolynyń bapkeri Álibek Júsipovtiń jol apatyna túsip, mezgilsiz qaitys bolýyna bailanysty kóńil aitý jedelhatyn joldady, dep habarlaidy Dalanews.kz.
Fýtbol federatsiiasy óz tarapynan marqumnyń otbasyna jan-jaqty kómek kórsetiletinin de jetkizdi.
"Álibek Júsipov balalar men jasóspirimder fýtbolyn damytýǵa zor úles qosty. Ol bapkerlik qyzmetinde talai jas fýtbolshynyń jolyn ashyp, otandyq fýtbolǵa adal eńbek etti. Jaqsy adam, bilikti maman retinde esimizde máńgi saqtalady. Marqumnyń jany jánnatta, jatqan jeri jaily bolsyn!", delingen jedelhat mátininde.
Aita ketsek, 18 sáýirde Astana – Ereimentaý – Shiderti tas jolynda "Mersedes" markaly shaǵyn avtobýs jol apatyna ushyrady. Aqmola oblysy politsiia departamenti baspasóz qyzmetiniń málimetinshe, kólik júrgizýshisi aldyndaǵy júk kóligin basyp kezinde aýdarylǵany anyqtaldy. Mikroavtobýs salonynda 14 pen 16 jas aralyǵyndaǵy 16 bala jáne bir eresek adam, iaǵni jattyqtyrýshy bolǵan. Apat saldarynan bapker oqiǵa ornynda jan tapsyrdy. Balalar jaqyn mańdaǵy aýrýhanaǵa jetkizildi, olar dárigerlerdiń baqylaýynda.
Sońǵy kelip túsken aqparattarǵa sáikes, 16 balanyń 15-in Ereimentaýdaǵy aýrýhanadan ata-analary Pavlodarǵa alyp ketken. Olardyń kóbisi túrli deńgeidegi ortasha jáne jeńil jaraqat alǵan. Tek bir jasóspirim jansaqtaý bóliminde jatyr. Ony alda sanaviatsiia kómegimen Pavlodarda jetkizý josparlanyp otyr.
