Sottalǵan burynǵy mádeniet jáne sport ministri Arystanbek Muhamediulynyń áleýmettik jelidegi paraqshasynda kópmilliardtyq azamattyq daý jóninde málimdeme jariialandy, dep habarlaidy dalanews.kz.
Muhamediulynyń jazýynsha, Astana qalasynyń qylmystyq ister jónindegi sotynyń úkimimen odan memleket paidasyna 3,5 mlrd teńgeden astam qarajat óndirilgen. Bul qarjy memleketke keltirilgen zalaldy óteýge baǵyttalýy tiis bolǵan.
Sonymen qatar, Muhamediuly tarapynyń málimetinshe, astanalyq kásipker Serik Karymsaqov eks-ministrdiń jubaiyna 2,7 mlrd teńgeni qaitarýǵa mindettelgen. Otbasy bul qarajatty memleket aldyndaǵy mindettemelerdi oryndaýǵa jumsamaq bolǵanyn aitady.
Alaida keiinirek sottyń taǵy bir sheshimi qabyldanyp, Serik Karymsaqovtyń paidasyna Arystanbek Muhamediulynan, onyń jubaiy men qaiyn enesinen 4 mlrd teńgeden astam qarjy óndirilgen.
«Bitkoin salynǵan fleshka» daýy
Muhamediulynyń málimdeýinshe, bul talaptyń negizinde Arman Baiqadamnyń «bitkoin salynǵan fleshkany tapsyrdym» degen ýáji jatyr.
Is materialdaryna sáikes, Arman Baiqadam men Serik Karymsaqov arasynda talap etý quqyǵyn berý týraly kelisim jasalǵan. Sol kelisim boiynsha Baiqadam Muhamediulyna, onyń jubaiy men qaiyn enesine qatysty 4,131 mlrd teńge kólemindegi talap etý quqyǵyn Karymsaqovqa bergen.
Eks-ministr bul talaptyń zańdylyǵyna kúmán keltiredi. Onyń aitýynsha, sotta fleshkanyń naqty tapsyrylǵany, onyń ishinde bitkoin bolǵany, sondai-aq tsifrlyq aktivtiń quny qalai eseptelgeni jóninde jetkilikti dálelder usynylmaǵan.
Kelisimdi jaramsyz dep taný týraly talap aryz berilgen
Qazirgi ýaqytta jazasyn ótep jatqan Arystanbek Muhamediuly Arman Baiqadam men Serik Karymsaqov arasyndaǵy kelisimdi jaramsyz dep taný týraly sotqa talap aryz túsirgenin habarlady. Iske Astana qalasynyń prokýratýrasy, Qazaqstannyń Qarjylyq monitoring agenttigi jáne basqa da memlekettik organdar tartylǵan.
«Qarajat memleketke me, álde jeke tulǵaǵa ma beriledi?»
Muhamediuly bul sot protsesiniń nátijesi mańyzdy máseleni sheshýi múmkin ekenin aitady. Onyń pikirinshe, daý memleketke keltirilgen zalaldy óteýge baǵyttalýy tiis qarajattyń taǵdyryna qatysty bolyp otyr. Sondai-aq eks-ministr bul isti ashyq, jariia jáne beitarap túrde tergeýge shaqyryp, halyqaralyq quqyq qorǵaý uiymdary men buqaralyq aqparat quraldarynyń nazaryn aýdarýǵa úndedi.
Aita keteiik, jariialanǵan aqparat ázirge Arystanbek Muhamediulynyń jeke málimdemesine negizdelgen. Is boiynsha qarsy taraptyń ustanymy men sottyń resmi túsindirmesi jariialanǵan joq.
Eske salaiyq, buǵan deiin eks-ministr Muhamediulymen bailanysty bolǵan 1,3 milliard teńgeniń aktivi memleketke qaitarylǵan bolatyn.
