قازاقستان فۋتبول فەدەراسياسىنىڭ پرەزيدەنتى مارات وماروۆ بالالار فۋتبولىنىڭ باپكەرى الىبەك ءجۇسىپوۆتىڭ جول اپاتىنا ءتۇسىپ، مەزگىلسىز قايتىس بولۋىنا بايلانىستى كوڭىل ايتۋ جەدەلحاتىن جولدادى، دەپ حابارلايدى Dalanews.kz.
فۋتبول فەدەراسياسى ءوز تاراپىنان مارقۇمنىڭ وتباسىنا جان-جاقتى كومەك كورسەتىلەتىنىن دە جەتكىزدى.
"الىبەك ءجۇسىپوۆ بالالار مەن جاسوسپىرىمدەر فۋتبولىن دامىتۋعا زور ۇلەس قوستى. ول باپكەرلىك قىزمەتىندە تالاي جاس فۋتبولشىنىڭ جولىن اشىپ، وتاندىق فۋتبولعا ادال ەڭبەك ەتتى. جاقسى ادام، بىلىكتى مامان رەتىندە ەسىمىزدە ماڭگى ساقتالادى. مارقۇمنىڭ جانى ءجانناتتا، جاتقان جەرى جايلى بولسىن!"، دەلىنگەن جەدەلحات ماتىنىندە.
ايتا كەتسەك، 18 ساۋىردە استانا – ەرەيمەنتاۋ – شىدەرتى تاس جولىندا "مەرسەدەس" ماركالى شاعىن اۆتوبۋس جول اپاتىنا ۇشىرادى. اقمولا وبلىسى پوليسيا دەپارتامەنتى باسپا ءسوز قىزمەتىنىڭ مالىمەتىنشە، كولىك جۇرگىزۋشىسى الدىنداعى جۇك كولىگىن باسىپ كەزىندە اۋدارىلعانى انىقتالدى. ميكرواۆتوبۋس سالونىندا 14 پەن 16 جاس ارالىعىنداعى 16 بالا جانە ءبىر ەرەسەك ادام، ياعني جاتتىقتىرۋشى بولعان. اپات سالدارىنان باپكەر وقيعا ورنىندا جان تاپسىردى. بالالار جاقىن ماڭداعى اۋرۋحاناعا جەتكىزىلدى، ولار دارىگەرلەردىڭ باقىلاۋىندا.
سوڭعى كەلىپ تۇسكەن اقپاراتتارعا سايكەس، 16 بالانىڭ 15ء-ىن ەرەيمەنتاۋداعى اۋرۋحانادان اتا-انالارى پاۆلودارعا الىپ كەتكەن. ولاردىڭ كوبىسى ءتۇرلى دەڭگەيدەگى ورتاشا جانە جەڭىل جاراقات العان. تەك ءبىر ءجاسوسپىرىم جانساقتاۋ بولىمىندە جاتىر. ونى الدا ساناۆياسيا كومەگىمەن پاۆلوداردا جەتكىزۋ جوسپارلانىپ وتىر.
