Ulttyq Bank ekonomikaǵa berilgen bank sektorynyń nesieleri boiynsha kezekti esepti jariialady. Onda birden kózge túskeni – syiaqy mólsherlemeleri. Iaǵni, aqpan aiynda jeke tulǵalarǵa nesie boiynsha da, depozit boiynsha da belgilengen syiaqy mólsherlemeleri tómendegen. Al, zańdy tulǵalarǵa beriletin nesie, kerisinshe qymbattaǵan, dep habarlaidy Dalanews.kz.
Aqpan aiynyń qorytyndysy boiynsha jeke tulǵalarǵa berilgen nesie syiaqy mólsherlemesi 21,8%-dan (qańtarda osylai bolǵan) 20,5%-ǵa deiin tómendedi. Al, kerisinshe, zańdy tulǵalarǵa berilgen nesieniń jyldyq mólsherlemesi 17,9%-dan 18,3%-ǵa artqan.
Aqpan aiynyń qorytyndysy boiynsha teńgelei salynǵan depozitter boiynsha ortasha mólsherleme jeke tulǵalar úshin 13,5%-dan 13,3%-ǵa deiin tómendedi, biraq zańdy tulǵalarǵa, kerisinshe, azdap ústemelengen: 14,1%-dan 14,2% ǵa deiin. Jeke tulǵalar úshin eń tiimdi depozit 1 aidan 3 aiǵa deiingi merzimdegileri qamtidy: olar boiynsha ortasha syiaqy mólsherlemesi 15,3% quraidy.
Jeke tulǵalarǵa berilgen nesieniń jalpy somasy qańtarǵa qaraǵanda 1,7%-ǵa ósip, 1,3 trln teńgeni qurady. Onyń teń jartysyn kepilsiz tutynýshylyq nesie quraidy. Al odan keiin ipotekalyq nesie men avtonesieniń kezegi keledi.
Aldyńǵy aimen salystyrǵanda avtonesie 36,1% qosyp, 165 mlrd teńgege jetti. Aldyńǵy aidaǵy kúrt quldyraýdan keiin bul baǵyt qaita qalpyna kelip jatqan siiaqty. Bir jyl ishindegi ósim 28,8%-dy quraidy.
Ipotekalyq nesie kólemi ekinshi ai qatarynan tómendeýde. Eki ai arasyndaǵy quldyraý aitarlyqtai emes, árine. Bir aida kórsetkish 0,2% joǵaltyp, 152,8 mlrd teńgege deiin tómendedi. Ipotekalyq zaim boiynsha qaryz kólemi 6,7 trln teńgeni quraidy. Aitqandai, aqpan aiynda sońǵy 11 aida alǵash ret berilgen avtonesieler kólemi berilgen ipotekalyq zaimdar kólemin orap ótti.
Ótken aida kepilsiz tutynýshylyq nesieler kóleminde de qysqarý boldy: - 4,1%, 838,5 mlrd teńgege deiin. Iaǵni, qańtar aiymen salystyrǵanda aqpanda bul nesie túrin tirketýshi adamdar sany 14,6%-ǵa qysqardy. Kredit sany da 21,2%-ǵa tómendegen.
Aita ketsek, Ulttyq bank naýryzda bazalyq mólsherlemeni 15,25%-dan 16,5%-ǵa kótergen bolatyn. Buǵan deiin saitymyzda atalǵan taqyrypta "Qarjyger-maman aldaǵy eki jyl halyq pen bizneske qiyn tietinin boljady" degen maqala jariialanǵan bolatyn.
