Almaty oblysynda zirattardy talqandap júrgen adam ustaldy. Bul týraly politsiia málimdedi, – dep habarlaidy Dalanews.kz.
Vandalizm deregi boiynsha qylmystyq is tirkelgen.
"Kúdikti ustalyp, politsiia bólimine jetkizildi. Qazir bolǵan oqiǵanyń barlyq mán-jaiyn anyqtaýǵa baǵyttalǵan tergeý júrgizilip jatyr. Áleýmettik jelilerde taraǵan, kúdiktiniń salafizmniń dini aǵymyna qatysy bary týraly aqparat aldyn ala tekseris barysynda rastalmady. Tergeý aiaqtalǵanǵa deiin merziminen buryn qorytyndy jasaýdan jáne tekserilmegen málimetterdi taratýdan bas tartýdy suraimyz", - dep jazylǵan habarlamada.
Eske salaiyq, buǵan deiin jýrnalist Dias Nuraqyn Almaty oblysy Saty aýylynda bir jigit ziratty talqandap tastaǵanyn aityp, áleýmettik jelide video jariialady.
Kadrlarda ár jerde shashylǵan zirat tastary kórinedi.
"Kólsaidyń túbindegi Saty aýylyn soqyr senim kezip júr. Osy aýyldyń bir jigiti "dinimizge qaishy" degen jeleýmen ziratty talqandap tastapty. Ólgen adamdardyń qulyptastaryn qiratyp, jan-jaqqa laqtyryp ketken", - dep jazdy ol.
Dias Nuraqynnyń sózinshe, jaqyndarynyń qabiri qorlanǵanyn kórgen aiadai ǵana aýyl turǵyndary ashýly.
"Osyndai ásiredinshilerdiń kesirinen el arasyna iritki túsedi. Bir esersoq bútin bir aýyldyń berekesin qashyrady. Bir qumalaq bir qaryn maidi shiritedi. Munyń bári - tiktok imamdardyń, ýaǵyzshyl ustazdardyń kesiri. Bir ǵana kitap oqyp alǵan, kókiregi soqyr adamdar solarǵa senip, asyl dinimizdi lastap bitti", - dep jazdy jýrnalist.
Májilis depýtaty, zańger Abzal Quspan bul jaǵdaida zańǵa sáikes jaýapqa tartýǵa bolatynyn málimdedi.
"Qylmystyq kodekstiń 314-babymen qýdalanatyn áreket, jergilikti organǵa júginý kerek", - dedi ol.
