Memleket basshysy Qasym-Jomart Toqaevtyń tóraǵalyǵymen Mańǵystaý oblysynyń áleýmettik-ekonomikalyq damýy jónindegi keńes ótti, – dep habarlaidy Dalanews.kz.
"Men búgin Aqtaýǵa jumys saparymen arnaiy kelip otyrmyn. Basty maqsat – oblystyń ahýalymen tanysý, aimaqtaǵy ózekti máselelerdi talqylaý. Elimiz úshin Mańǵystaýdyń orny bólek. Bul – strategiialyq mańyzy bar aimaq. Mańǵystaýdy batys qaqpasy deýge bolady. Men oblystyń tynys-tirshiligin erekshe nazarda ustaimyn. Sondyqtan búgin aimaqtyń áleýmettik-ekonomikalyq damý barysyn egjei-tegjeili talqylaýymyz qajet. Aimaqtyń jalpy ónimi eki jylda 1,3 esege ósti. Ótken jyldyń bastapqy 9 aiynda óńirlik jalpy ónim 3,7 trillion teńgege jetti. Bul kórsetkish, bir qaraǵanda, jaman emes. Biyl birinshi toqsandaǵy ekonomikalyq indikator 104,8 paiyz boldy. Oblysqa sońǵy eki jylda 2 trillion teńgeden astam investitsiia tartyldy. Aimaq turǵyndarynyń sany úzdiksiz ósip keledi. Qazir munda 800 myńnan astam adam turady. Jaqynda men Shymkentke barǵanda kóshi-qondy, iaǵni, migratsiiany baqylaýsyz qaldyrýǵa bolmaidy dep aittym. Boljam boiynsha kóp uzamai oblystaǵy halyq sany bir millionǵa jetýi yqtimal, tipti, odan asýy da múmkin. Bul jaǵdai ekonomikaǵa jáne áleýmettik infraqurylymǵa qosymsha salmaq túsiredi. Bul faktordy umytpaýymyz kerek, popýlizmge urynbaǵan jón. Men buǵan deiin taza aýyz sý máselesin sheshýdi, bilim berý jáne densaýlyq saqtaý júiesin jaqsartýdy tapsyrdym. Azyq-túlik qaýipsizdigin qamtamasyz etý, kólik-logistika áleýetin arttyrý jáne týrizm salasyn damytý jóninde naqty mindetter qoiyldy.
Biraz sharýa jasalǵan. Jetistikter az emes, biraq kemshilikter de bar. Ony moiyndaý kerek jáne ashyq aitý qajet. Naqty jospar bar, mindetter – belgili. Ózekti máselelerdi sheshý úshin Úkimet pen ákimdik kúsh jumyldyryp, belsendi jumys isteýge tiis. Ákim Nurdáýlet Qilybai jumysyna belsendi túrde kiristi, aldynda turǵan mindetterdi, máselelerdi túsinedi, olardy sheshý joldaryn biledi. Taiaý arada nátijelerdi kútemin. Onyń kótergen máseleleri – óte ózekti, bul máselelerdi Úkimet muqiiat qaraýy kerek. Basty maqsat – oblys turǵyndarynyń turmys sapasyn jaqsartý. Bul – anyq nárse", - dedi Prezident.
Qasym-Jomart Toqaev naqty tapsyrma berdi.
"Qoryta aitqanda, birinshi talabym – bárimiz adal jumys isteýimiz kerek. Ekinshi talabym – bárimiz ozyq oily bolýymyz qajet. Úshinshi talabym – jastarymyzǵa durys bilim men tárbie berip, olarǵa jol ashýymyz kerek. Al Mańǵystaý oblysyna kelsek, biz bul aimaqty jedel damýdyń úlgisi retinde kórsetýimiz kerek. Oblystyń áleýeti zor. Sony tiimdi paidalanbasaq, bárimizge keshirilmes kúná bolady", - dedi Memleket basshysy.
