مەملەكەت باسشىسى قاسىم-جومارت توقايەۆتىڭ توراعالىعىمەن ماڭعىستاۋ وبلىسىنىڭ الەۋمەتتىك-ەكونوميكالىق دامۋى جونىندەگى كەڭەس ءوتتى، – دەپ حابارلايدى Dalanews.kz.
"مەن بۇگىن اقتاۋعا جۇمىس ساپارىمەن ارنايى كەلىپ وتىرمىن. باستى ماقسات – وبلىستىڭ احۋالىمەن تانىسۋ، ايماقتاعى وزەكتى ماسەلەلەردى تالقىلاۋ. ەلىمىز ءۇشىن ماڭعىستاۋدىڭ ورنى بولەك. بۇل – ستراتەگيالىق ماڭىزى بار ايماق. ماڭعىستاۋدى باتىس قاقپاسى دەۋگە بولادى. مەن وبلىستىڭ تىنىس-تىرشىلىگىن ەرەكشە نازاردا ۇستايمىن. سوندىقتان بۇگىن ايماقتىڭ الەۋمەتتىك-ەكونوميكالىق دامۋ بارىسىن ەگجەي-تەگجەيلى تالقىلاۋىمىز قاجەت. ايماقتىڭ جالپى ءونىمى ەكى جىلدا 1،3 ەسەگە ءوستى. وتكەن جىلدىڭ باستاپقى 9 ايىندا وڭىرلىك جالپى ءونىم 3،7 تريلليون تەڭگەگە جەتتى. بۇل كورسەتكىش، ءبىر قاراعاندا، جامان ەمەس. بيىل ءبىرىنشى توقسانداعى ەكونوميكالىق ينديكاتور 104،8 پايىز بولدى. وبلىسقا سوڭعى ەكى جىلدا 2 تريلليون تەڭگەدەن استام ينۆەستيسيا تارتىلدى. ايماق تۇرعىندارىنىڭ سانى ۇزدىكسىز ءوسىپ كەلەدى. ءقازىر مۇندا 800 مىڭنان استام ادام تۇرادى. جاقىندا مەن شىمكەنتكە بارعاندا كوشى-قوندى، ياعني، ميگراسيانى باقىلاۋسىز قالدىرۋعا بولمايدى دەپ ايتتىم. بولجام بويىنشا كوپ ۇزاماي وبلىستاعى حالىق سانى ءبىر ميلليونعا جەتۋى ىقتيمال، ءتىپتى، ودان اسۋى دا مۇمكىن. بۇل جاعداي ەكونوميكاعا جانە الەۋمەتتىك ينفراقۇرىلىمعا قوسىمشا سالماق تۇسىرەدى. بۇل فاكتوردى ۇمىتپاۋىمىز كەرەك، پوپۋليزمگە ۇرىنباعان ءجون. مەن بۇعان دەيىن تازا اۋىز سۋ ماسەلەسىن شەشۋدى، ءبىلىم بەرۋ جانە دەنساۋلىق ساقتاۋ جۇيەسىن جاقسارتۋدى تاپسىردىم. ازىق-تۇلىك قاۋىپسىزدىگىن قامتاماسىز ەتۋ، كولىك-لوگيستيكا الەۋەتىن ارتتىرۋ جانە تۋريزم سالاسىن دامىتۋ جونىندە ناقتى مىندەتتەر قويىلدى.
ءبىراز شارۋا جاسالعان. جەتىستىكتەر از ەمەس، ءبىراق كەمشىلىكتەر دە بار. ونى مويىنداۋ كەرەك جانە اشىق ايتۋ قاجەت. ناقتى جوسپار بار، مىندەتتەر – بەلگىلى. وزەكتى ماسەلەلەردى شەشۋ ءۇشىن ۇكىمەت پەن اكىمدىك كۇش جۇمىلدىرىپ، بەلسەندى جۇمىس ىستەۋگە ءتيىس. اكىم نۇرداۋلەت قيلىباي جۇمىسىنا بەلسەندى تۇردە كىرىستى، الدىندا تۇرعان مىندەتتەردى، ماسەلەلەردى تۇسىنەدى، ولاردى شەشۋ جولدارىن بىلەدى. تاياۋ ارادا ناتيجەلەردى كۇتەمىن. ونىڭ كوتەرگەن ماسەلەلەرى – وتە وزەكتى، بۇل ماسەلەلەردى ۇكىمەت مۇقيات قاراۋى كەرەك. باستى ماقسات – وبلىس تۇرعىندارىنىڭ تۇرمىس ساپاسىن جاقسارتۋ. بۇل – انىق نارسە"، - دەدى پرەزيدەنت.
قاسىم-جومارت توقايەۆ ناقتى تاپسىرما بەردى.
"قورىتا ايتقاندا، ءبىرىنشى تالابىم – ءبارىمىز ادال جۇمىس ىستەۋىمىز كەرەك. ەكىنشى تالابىم – ءبارىمىز وزىق ويلى بولۋىمىز قاجەت. ءۇشىنشى تالابىم – جاستارىمىزعا دۇرىس ءبىلىم مەن تاربيە بەرىپ، ولارعا جول اشۋىمىز كەرەك. ال ماڭعىستاۋ وبلىسىنا كەلسەك، ءبىز بۇل ايماقتى جەدەل دامۋدىڭ ۇلگىسى رەتىندە كورسەتۋىمىز كەرەك. وبلىستىڭ الەۋەتى زور. سونى ءتيىمدى پايدالانباساق، بارىمىزگە كەشىرىلمەس كۇنا بولادى"، - دەدى مەملەكەت باسشىسى.
