18 sáýir kúni Ulan aýdanynyń ortalyǵynda Qasym Qaisenov kentiniń balalary, ata-analary men muǵalimderi úshin qýanyshty oqiǵa oryn aldy – zamanaýi jańa mýzyka mektebiniń ashylý saltanaty ótti, - dep habarlaidy Dalanews.kz
Saltanatty is-sharaǵa QR Oqý-aǵartý ministri Ǵani Beisembaev pen ShQO ákimi Nurymbet Saqtaǵanov qatysty.
Ministrdiń aitýynsha, bul mekteptiń ashylýy – Ulan aýdany úshin mańyzdy oqiǵa ári shyǵarmashylyqqa beiim balalardyń qabiletterin damytyp, ónerge degen qyzyǵýshylyǵyn arttyryp, sapaly bilim alýyna úlken múmkindik.
"Sizderdi shyn júrekten jańa mýzyka mektebiniń ashylýymen quttyqtaimyn! Bul – jas urpaqtyń bolashaǵyna jol ashatyn daryn ordasy. Bul mańyzdy oqiǵanyń Qazaqstan halqy Assambleiasynyń 30 jyldyǵy men Uly Jeńistiń 80 jyldyǵy qarsańynda ótip jatqany – erekshe mánge ie.
Memleket basshysy Qasym-Jomart Toqaev Ulttyq quryltai otyrysynda qosymsha bilim berýdi ósip kele jatqan urpaqtyń jan-jaqty tárbiesiniń negizgi elementi retinde damytý qajet ekenin atap ótti. Ol bilim men tárbie qatar júrýi tiis ekenin aitty. "Adal azamat" baǵdarlamasy – ulttyq qundylyqtarǵa sai adal ári bilimdi urpaq tárbieleýdiń negizi bolady", – dedi ministr.
Shyǵys Qazaqstan oblysy balalardy qosymsha bilimmen qamtý boiynsha respýblikada aldyńǵy qatarda – bul kórsetkish 94%-dy quraidy.
Jańa mýzyka mektebiniń ashylýy – 500-den astam balanyń dombyra, skripka, fortepiano, jetigen, sherter, qylqobyz, gitara aspaptarynda oinaýdy úirenýge, horeografiia, vokal, teatr óneri jáne basqa da baǵyttarda bilim alýǵa múmkindik beretin jarqyn mysal.
"Bul balalardyń shyǵarmashylyq qabiletterin damytyp, ónerge baýlityn erekshe bilim ordasy bolady", – dedi quttyqtaý sózinde ShQO ákimi Nurymbet Saqtaǵanov.
Ákim balalarǵa halyqaralyq, respýblikalyq jáne oblystyq baiqaýlarda joǵary jetistikterge jetýdi tiledi.
Jańa mektep ǵimaratynda zaman talabyna sai jabdyqtalǵan 14 oqý kabineti bar. Horeografiia kabineti ainalar men stanoktarmen tolyq jabdyqtalǵan. 126 oryndyq kontsert zalynda uzyndyǵy 9 metr, biiktigi 4 metr bolatyn LED-ekran ornatylǵan. Bul mádeni jáne oqý is-sharalaryn joǵary deńgeide jáne kóp kórermenniń qatysýymen ótkizýge múmkindik beredi.
