Oblys ákimi Nariman Tóreǵaliev Eýropalyq Odaqtyń Qazaqstandaǵy Elshisi Aleshka Simkich bastap kelgen mártebeli meimandarmen kezdesti. Resmi delegatsiia quramynda Avstriia, Belgiia, Kipr, Finliandiia, Frantsiia, Latviia, Litva, Portýgaliia, Serbiia, Ispaniia, Kanada memleketteriniń elshileri jáne Estoniia, Polsha, Shveitsariia elderiniń ýaqytsha senimdi ókilderi boldy. Eýroodaqqa múshe emes memleketter ókilderiniń de qatysýy halyqaralyq yntymaqtastyqtyń aýqymyn keńeitip, mańyzyn arttyra tústi. Basty maqsat – aradaǵy alys-beris, barys-kelisti arttyrý, dep habarlaidy dalanews.kz.
Aimaq basshysy elshilerdiń Jaiyq jerine resmi sapary Batys Qazaqstan oblysy men Eýroodaq elderi arasyndaǵy yntymaqtastyqty jańa deńgeige kóteretinine senim bildirdi.
- Kúni keshe Briýsselde ótken alqaly jiynda Memleket basshysy Qasym-Jomart Kemeluly Toqaev sóz sóilep, Qazaqstan men Eýropalyq Odaq arasyndaǵy qarym-qatynas shynaiy strategiialyq sipatqa ie bolǵanyn atap ótti. Prezident tapsyrmasyna sáikes tikelei sheteldik investitsiia tartý baǵytynda bizdiń aimaqta da aýqymdy jumystar atqaryldy. Batys Qazaqstan oblysy Bolgariia, Vengriia, Italiia, Germaniia, Ulybritaniia, Niderland Koroldigi, Qytai jáne Koreia Respýblikasy siiaqty eldermen tyǵyz bailanys ornatty. 2025 jyldyń qorytyndysy boiynsha óńirimizdiń Eýropalyq Odaq elderimen taýar ainalymy 5 mlrd dollardan asty, - dedi Nariman Tóreǵaliev.
Eýropalyq Odaqtyń Qazaqstandaǵy Elshisi Aleshka Simkich memleketter basshylary deńgeiindegi kelissózder aiasynda ekonomikalyq yqpaldastyqty odan ári arttyrýdyń mańyzyn atap ótti.
- Eýropalyq Odaq Qazaqstannyń eń iri saýda jáne investitsiialyq seriktesi sanalady. Biz bul baǵyttardaǵy bailanysty bekemdeýge múddelimiz. Óńirlerge sapardyń maqsaty da osy. 1 shildede jańa Konstitýtsiia kúshine enedi. Tamyz aiynda Quryltai sailaýy ótedi. Biz Qazaqstandaǵy barlyq saiasi ózgeristerge mán berip, jańa damý kezeńine kýá bolyp otyrmyz, - dedi Aleshka Simkich.
Elshiler óńirdiń negizgi erekshelikteri men investorlardy qoldaý sharalary týraly suraqtar qoiyp, ózara pikir alysty.
Aita keteiik, biyl óńirge 1 trln teńgeden astam investitsiia tartý josparlanyp otyr.
