Búgin «Óner ortalyǵynda» 28 maýsym – Buqaralyq aqparat quraldary qyzmetkerleri kúnine arnalǵan «Qanatty qalam – 2026» saltanatty sharasy ótti. Oǵan oblys ákimi Murat Ergeshbaev, oblystyq máslihat tóraǵasy Murat Tleýmbetov, ziialy qaýym ókilderi men sala ardagerleri qatysty, dep habarlaidy dalanews.kz.
Aimaq basshysy jýrnalisterdi kásibi merekemen quttyqtap, óńirdegi bastamalar men jańashyldyqtardy halyqqa shynaiy jetkizýdegi eńbekterin joǵary baǵalady.
«Búgin – merzimdi basylymdar men telearnalarda, aqparattyq agenttikter men saittarda qyzmet isteitin shyǵarmashylyq ókilderiniń, jýrnalist jasaǵan siýjet pen jazǵan maqalanyń jaryqqa shyǵýyna eńbek sińiretin mamandardyń mereili kúni.
Mereke qarsańynda Prezidentimiz Qasym-Jomart Kemeluly buqaralyq aqparat quraldary ókilderin Aqorda tórinde qabyldap, memlekettik nagradalar tabystady.
«Qyzylorda» telearnasynyń ardageri Qarabala Jaǵyppar Amanjoluly «Parasat» ordenimen nagradtaldy. Bul – Syr jýrnalistikasyna berilgen joǵary baǵa.
Memleket basshysy: «Jýrnalister qaýymy – eń aldymen qoǵamnyń jarshysy ári shynaiy janashyry. Sizder árdaiym halyqtyń kókeiinde júrgen ózekti máselelerdi kóterip, jurt múddesine adal qyzmet etip kelesizder. Memleket sizderdiń eren eńbekterińizdi joǵary baǵalaidy» dep erekshe atap ótti.
Ulttyq jýrnalistika tarihynda Syr óńiriniń airyqsha orny bar. Ǵasyrlyq belesine jaqyndaǵan basylymdar men táýelsizdik jyldarynda shyqqan gazetter – aimaqtyń syr-shejire sandyǵy. Oblystyń tarihy, áleýmettik-ekonomikalyq damýy men mádeni-rýhani jańǵyrýynyń aiqyn derekkózi.
Biyl aimaǵymyzdyń jetekshi arnasy – «Qyzylorda» telearnasy 35 jyldyq mereitoiyn atap ótti. Telearna óńirimizdegi oqiǵalar men aqparattardy jyldam taratyp, el ómirindegi saiasi mańyzdy jańalyqtardyń jarshysy bolyp keledi.
Otyz jylǵa jýyq kórermen kózaiymyna ainalǵan «Qoǵam TV» telearnasynyń da aqparattyq saiasattaǵy orny erekshe. Aimaq televiziiasynyń búgingi biigi – ótken men búgindi jalǵaǵan ardagerler eńbeginiń jemisi. Aqparat aidynynda óz qoltańbasyn qaldyrǵan maitalman mamandardyń tabandylyǵy men qajyrly eńbegi telejýrnalistika tarihynda laiyqty izin qaldyrdy.
Búginde taǵylymdy joldan ótip, ustazdarynyń ónegesin jalǵaǵan mamandar elimizge belgili iri mediaholdingterde, telearnalarda eńbek etip, Syr jýrnalistikasy mektebiniń mereiin ústem etýde.
Táýelsizdik shejiresin, Syr óńiriniń jylnamasyn, qalyptastyrýdaǵy qajyrly eńbekterińiz úshin Sizderge alǵysymdy bildiremin!», – dedi Murat Nálqojauly.
Keshe Aqorda tórinde ótken rásimde Memleket basshysy jýrnalisterdi qoldaýǵa, áleýmettik jaǵdaiyn jaqsartýǵa basa mán beriletinin aitqan edi. Keiingi úsh jylda Astana qalasynda ǵana 200 jýrnalist baspanaly bolsa, endi bul bastamanyń aýqymy keńeidi. Prezident tapsyrmasymen biyl alǵash ret oblystarda jumys isteitin aqparat salasynyń 66 qyzmetkerine páter kilti berildi.
Bizdiń aimaqta «Syr media» seriktestigi direktorynyń orynbasary Áziz Batyrbekovke jáne «Qyzylorda» telearnasynyń teleoperatory Ramazan Júsipbekke páter kiltteri tabystaldy.
Saltanatty rásimde aqparat salasynyń damýyna eleýli úles qosqan qalam ieleri «Parasat», «Qurmet» ordenderimen, «Eren eńbegi úshin» medalimen, QR Mádeniet jáne aqparat ministrliginiń «Eńbek ardageri», «Aqparat salasynyń úzdigi» tósbelgilerimen, Qurmet gramotasymen, Qazaqstan Jýrnalister odaǵynyń «Qazaqstannyń Qurmetti jýrnalisi» ataǵymen, QR Premer-ministriniń birinshi orynbasarynyń, Premer-ministriniń orynbasary – Mádeniet jáne aqparat ministriniń, oblys ákiminiń Alǵys hattarymen, Qurmet gramotasymen jáne túrli nominatsiialarmen marapattaldy.
