Abai oblysynyń mádeniet, tilderdi damytý jáne arhiv isi basqarmasynyń basshysy Janjigit Omarhan óńirdegi mádeniet salasynyń ardagerlerimen jáne jastar qaýymymen kezdesti. Kezdesýge eki júzden asa adam qatysty, - dep habarlaidy Dalanews.kz
Jiyn basynda basqarmaǵa qarasty mekemelerdiń basshylaryn oryndarynan turǵyzyp jurtshylyqqa kórsetip, aldaǵy ýaqytta jumystardy osy azamattarmen birigip atqaratynyn atap ótti. Basqarmanyń qysqa jáne uzaq merzimdi jospary jasalatynyn aityp, óńirlik kórkemdik keńes qurý, sondai-aq «Rýhaniiat álemi» atty portal ashý týraly bastamalaryn usyndy. Atalǵan portal óńir rýhaniiatyn keńinen nasihattap, bar qundylyqty tsifrlandyra otyryp bir jerge jinaqtap, el múddesi úshin qyzmet etetin mańyzdy alańǵa ainalatynyn jetkizdi.
Kezdesý barysynda mádeniet salasyndaǵy ózekti máseleler, onyń ishinde teatr infraqurylymyna qatysty túitkilder de kóterildi.
«Bir ǵimaratta úsh teatr jumys istep otyrǵanyn oblys ákimi Berik Ýáli myrzanyń aldynda kótergem. Arasyna apta salmai sol máseleni Memleket basshysy Býrabaida ótken IV Ulttyq Quryltai otyrysynda óz aýzymen aityp «Halyq únine qulaq asatyn memleket» qaǵidatynyń naqty kórinisin dáleldedi. Másele jeter jerine jetken eken, ákimge rahmet, endi sheshiletin shyǵar», - dep oi túiindedi “Abai” qoǵamdyq qorynyń prezidenti Otantai Káribjanov.
Sonymen qatar qolónershilerge arnaiy oryn bólý, belgili mádeniet qairatkeri Temirjan Bazarbaevtyń mereitoiyn ótkizý siiaqty birqatar usynystar aityldy.
«Barlyq usynystar men suraqtar nazarǵa alynady. Osy jerde hattama toltyrylyp jatyr, ári qarai jumysqa kirisemiz, bizdiń quzyretimizge jatpaityndary tiisti organdarǵa jetkiziledi, ózderińizben birge jumys jasaimyz. Qordalanǵan máselelerdiń sheshimi bir kúnniń enshisinde emes, kezeń-kezeńimen sheshemiz dep oilaimyn», - dedi Janjigit Abzalbekuly.
