Almatyda qoǵamdyq kólik jumysyna qatysty apta saiyn shamamen 800 shaǵym túsedi. Qala turǵyndary kóbine avtobýsty uzaq kútetinine, salon tazalyǵyna, konditsioner jumys istemeitinine, júrgizýshilerdiń áreketine narazy. Osyǵan bailanysty qala biligi tasymaldaýshylarǵa baqylaýdy kúsheitip, kún saiyn jelidegi avtobýstar men júrgizýshilerdi tekseretin baqylaý qyzmetin qurǵan, dep habarlaidy dalanews.kz.
Bul týraly Jolaýshylar kóligi men jol qozǵalysyn uiymdastyrý basqarmasynyń basshysy Erjan Dihanbaev málimdedi. Basqarma basshysynyń aitýynsha, qoǵamdyq kóliktegi jol aqysyn kóterý máselesi qarastyrylyp jatqan joq. Onyń ornyna bilik tasymal sapasyn arttyryp, tasymaldaýshylar arasyndaǵy tártipti kúsheitýge nazar aýdarmaq.
"Qoǵamdyq kólik árdaiym qoǵam nazarynda bolǵandyqtan, syn-pikir de kóp aitylady. Biz turǵyndardyń ótinishin kún saiyn Open Almaty, e-Otinish, áleýmettik jeli men basqa da resmi arnalar arqyly baqylap otyramyz. Kóbine avtobýsty uzaq kútýge bailanysty, tazalyq pen konditsionerge qatysty shaǵym túsedi. Anyqtalǵan ár zańbuzýshylyq boiynsha tasymaldaýshyǵa qatysty shara qabyldanady", — dedi Erjan Dihanbaev.
Basqarma málimetinshe, aptasyna shamamen 300 ótinish Open Almaty arqyly, taǵy 400-i e-Otinish júiesi arqyly túsedi. Eń kóp shaǵym qalada úlken is-shara ótkende, aýa raiy nasharlaǵan kezde, kólik qozǵalysyna áser etetin jol apaty bolǵan sátterde tirkeledi.
Baqylaýdy kúsheitý maqsatynda Almatyda baqylaý qyzmeti quryldy. Onyń qyzmetkerleri avtobýstardyń sanitarlyq jáne tehnikalyq jaǵdaiyn, qozǵalys kestesi saqtalýyn tekseredi, sondai-aq, júrgizýshilerdiń temeki shegip, rólde telefon ustap, jolaýshylarǵa dórekilik kórsetip, aialdamadan ótip ketýi siiaqty zańbuzýshylyqtardy tirkeidi.
