Oral qalasynda alǵash ret «Jasandy intellekt negizindegi ziiatkerlik telemeditsina» atty Qazaqstan–Koreia halyqaralyq simpoziýmy ótti. Aýqymdy sharaǵa Batys Qazaqstan oblysynyń ákimi Nariman Tóreǵaliev, Koreia Respýblikasynyń Katoliktik Kvandong ýniversiteti janyndaǵy «Áýlie Mariia» halyqaralyq klinikasynyń prezidenti Ko Dong Hion bastaǵan delegatsiia jáne óńir dárigerleri qatysty, dep habarlaidy dalanews.kz.
Halyqaralyq simpoziým aiasynda oblystyq kópbeiindi aýrýhanada jańa telemeditsina bólmesi saltanatty túrde ashyldy. Bul joba — aimaq basshysynyń 2025 jylǵy qarasha aiynda Ońtústik Koreiaǵa jasaǵan jumys sapary kezinde bekitilgen mańyzdy memorandýmdardyń naqty nátijesi. Ekijaqty kelisim aiasynda biyl nevrologiia jáne neirohirýrgiia salasyndaǵy oraldyq 10 maman «Áýlie Mariia» klinikasynda taǵlymdamadan ótti.
Oblys ákimi Nariman Tóreǵaliev qashyqtan meditsinalyq qyzmetti damytý jónindegi Prezident tapsyrmalarynyń óńirde júieli oryndalyp jatqanyn atap ótti.
– Memleket basshysy Qasym-Jomart Kemeluly Toqaevtyń Jarlyǵymen bekitilgen Ulttyq damý josparynda aiqyndalǵan baǵdarly kórsetkishtiń biri – 2029 jylǵa deiin ortasha ómir súrý uzaqtyǵyn 77 jasqa deiin jetkizý. Osy maqsat-mindetterdi oryndaý jolynda júieli jospar bar. Búgingi halyqaralyq simpoziým men densaýlyq saqtaý júiesin jetildirýge baǵyttalǵan kelisimderdiń iske asýy jergilikti mamandardyń biliktiligin arttyryp, jańa jetistikterge jol ashady. Ońtústik koreialyq áriptestermen ornatylǵan tiimdi bailanys barlyq tarap úshin nátijeli bolmaq, – dedi aimaq basshysy.
Óz kezeginde klinika prezidenti Ko Dong Hion da birlesken jobalardy jan-jaqty damytýǵa daiyn ekenin jetkizdi. Halyqaralyq is-sharada sheteldik mamandar jasandy intellekt kómegimen aýrýdy erte anyqtaý, telemeditsinadaǵy ziiatkerlik sheshimder jáne tsifrlyq derekter qaýipsizdigi boiynsha ozyq tájiribelerimen bólisti.
