Qasym-Jomart Toqaev sóziniń sońynda ulttyq mádenietti damytýǵa, halyqtyń rýhani dúniesin baiytýǵa úles qosyp júrgen birqatar azamatty joǵary memlekettik nagradalarmen marapattaý týraly sheshim qabyldaǵanyn aitty, dep habarlaidy dalanews.kz.
Memleket basshysy qazaqtyń dástúrli ónerin uzaq jyldar boiy nasihattap kele jatqan ánshi ári dombyrashy Tatiana Býrmistrovany erekshe atap ótti. Prezidenttiń aitýynsha, ol jarty ǵasyrǵa jýyq ýaqyt boiy ulttyq ónerdi keńinen dáriptep, jas talanttarǵa ónege kórsetip keledi. Osy eńbegi úshin Tatiana Býrmistrovaǵa elimizdiń eń joǵary nagradalarynyń biri – "Otan" ordeni berilmek.
Sonymen qatar Qazaqstannyń halyq ártisi, jeztańdai ánshi Maqpal Júnisova II dárejeli "Barys" ordenimen marapattalady. Toqaev óner iesiniń halyq arasynda, ásirese áielder qaýymy arasynda erekshe qurmetke ie ekenin atap ótti.
Mihail Lermontov atyndaǵy ulttyq orys drama teatrynyń aktrisasy Marina Gantseva da memlekettik nagradaǵa laiyq dep tanyldy. Ol Qazaqstan mádenietiniń damýyna qosqan úlesi úshin III dárejeli "Barys" ordenimen marapattalmaq.
Prezident kásibi mereke qarsańynda mádeniet salasyna eńbek sińirgen birneshe óner qairatkerine "Qazaqstannyń halyq ártisi" ataǵy beriletinin de aitty. Jalpy, biyl elimiz boiynsha 120 mádeniet jáne óner qyzmetkeri memlekettik marapatqa ie bolady.
