Túrkistan oblysynda 17 jyl boiy quldyqta bolǵan Nazgúl men Qundyzǵa syilanǵan baspana ózge adamǵa satylyp ketken. Bul týraly Rýslan Ótepbai video jariialady, – dep habarlaidy Dalanews.kz.
Jýrnalistiń sózinshe, 2022 jyly jazda Iliias Sariev "Elge kómek" qaiyrymdylyq qorynyń atynan Almaty oblysy Qarasai aýdany Kemertoǵan aýylynan 10 muqtaj janǵa tegin baspana beremiz dep, elden sadaqa jinaǵan. Ishinde Nazgúl ben Qundyzǵa arnalǵan baspana da bar.
"Eldiń úii" degen tamasha atty ielengen baspanaǵa sekýnd saiyn qalyń qazaq qomaqty soma salady", - dep jazdy jýrnalist.
Mán-jaidy anyqtaý úshin Rýslan Ótepbai Qarasai aýdanyna barǵan. Al ol jaqtaǵylar bul jer Marsbek degen kisige satylǵanyn, qurylys bitken soń qonaqúi bolatynyn aitqan, al tanymal habarlandyrý saityna 45 mln teńgege jarnamasy jariialanǵan.
Aita keteiik, buǵan deiin "Elge kómek ber" qaiyrymdylyq qorynyń jetekshisi Iliias Sariev ustalǵanyn alǵashynda zańger Nursultan Orynbekov málimdedi. Onyń sózinshe, jurttan Sarievtiń ústine aryz túsken.
"Qazaq Robin Gýd Iliias Sariev alaiaqtyq baby boiynsha ustaldy. Almatydan osyndai habar keldi. Birneshe adamnan alaiaqtyq áreketi boiynsha aryz túsken edi. Qazir sol boiynsha ustalǵany belgili boldy. Aldanǵandar bolsa, Almaty IID-ne aryzdansańyzdar bolady", - dedi ol.
Artynsha Dalanews.kz Almaty Politsiia departamentine saýal joldap, resmi aqparat ta aldy.
"Almaly aýdandyq PB-na qarasty politsiia bólimi alaiaqtyq deregi boiynsha qylmystyq is qozǵady. Jan-jaqty jáne obektivti tergeýge baǵyttalǵan tergeý sharalary júrgizilip jatyr. Olardyń qorytyndysy boiynsha protsessýaldyq sheshim qabyldanady", - dep jazylǵan Almaty Politsiia departamentiniń buǵan deiingi jaýabynda.
