Qazaqstan elshiligi AQSh-ta zańsyz júrgen el azamattaryn óz erkimen keri qaitýǵa shaqyrady. Olarǵa keiin qurlyqtaǵy elge zańdy túrde barýdyń zańdy joly da usynylady, dep habarlaidy Dalanews.kz.
"Qurmetti Amerika Qurama Shtattaryndaǵy Qazaqstan Respýblikasynyń azamattary! AQSh biligi deportatsiialaý týraly sot sheshimin alsa da, elge qaitpai júrgen sheteldik azamattarǵa "CBP Home" mobildi qosymshasyn paidalaný arqyly múmkindiginshe qysqa merzimde óz erkimen elderine oralýǵa shaqyrýda ekenine nazar aýdaramyz", delingen elshilik málimdemesinde.
"CBP Home" mobildi qosymshasy arqyly óz eline qaitatyn azamattarǵa kelesi múmkindikter berilmek:
- Azamattyń ózi qalaǵan reispen erikti jáne qaýipsiz túrde elge oralý múmkindigi bar;
- AQSh-ta jumys jasap, tapqan qarajaty azamattyń ózinde qalady;
- Quzyrly organdar tarapynan qamaýǵa alynbaidy jáne májbúrli deportatsiiasyz óz eline oralady;
- Áýe biletin satyp alýǵa múmkindigi joq azamattarǵa qarjylai sýbsidiia alý múmkindigi beriledi;
- Bolashaqta zańdy túrde AQSh-qa qaita kelý quqyǵyna ie bolady.
Óz erkimen elderine qaitpaǵan jaǵdaida tómendegi sharalardy qoldaný josparlanýda:
- Jedel túrde deportatsiialaý. AQSh Ishki qaýipsizdik ministrliginiń (DHS) qyzmetkerleri eshbir daiyndyqsyz, azamattardy jedel túrde qamaýǵa alatyn bolady;
- Aiyppuldar men sanktsiialar. Eger azamat deportatsiia sheshimi bola turyp, eline qaitpaǵan bolsa oǵan táýligine 998 AQSh dollaryn quraityn aiyppul salynady. Bul rette aiyppul salý retrospektivti túrde, iaǵni bes jyl buryn elden ketý týraly sot sheshimi shyqqan azamattardan óndiriledi (bul jaǵdaida aiyppul shamamen 1 million dollarǵa deiin barýy múmkin). Aiyppuldy tóleý múmkindigi bolmaǵan jaǵdaida zańsyz júrgen sheteldikterge tiesili jyljymaityn jáne basqa da múlikterin memleket menshigine alý tásili qarastyrylady;
- Sonymen qatar, "CBP Home" arqyly qaitatynyn bildirip, eline oralmaǵan azamatqa 1000-5000 dollar kóleminde qosymsha aiyppul salynady;
- AQSh-qa qaita kelýge tyiym salynady. AQSh aýmaǵyna zańdy túrde qaita kirý quqyǵynan kóshi-qon júiesi arqyly bas tartý.
⠀"Osyǵan orai, Elshilik jaǵymsyz jaǵdailardyń aldyn alý maqsatynda qazaqstandyq azamattardy AQSh biligi usynylǵan múmkindikti paidalanýǵa shaqyrady".
