Senat tóraǵasy Máýlen Áshimbaev Ulttyq quryltai quramyna jańa adamdardyń, jastardyń, áielderdiń jáne óńir ókilderiniń kóbirek kelýi qajet ekenin aitty, dep habarlaidy dalanews.kz.
Onyń aitýynsha, tamyz aiynda ótetin Ulttyq quryltai sailaýy jańa ideialarǵa jol ashýy tiis.
«Tamyz aiynda Quryltaiǵa sailaý ótedi. Meniń tereń senimim - Quryltaiǵa jańa adamdar kelýi kerek. Bul jai ǵana diplomatiialyq sóz emes, bul - meniń jeke pikirim. Qazir ýaqyt óte qarqyndy, óte ózgermeli. Sondyqtan Quryltai quramynda jańa tulǵalar, bolashaǵynan úmit kúttiretin saiasatkerler, jastar, áielder jáne óńirlerdiń ókilderi kóbirek bolsa, bul elimiz úshin óte mańyzdy ári paidaly bolady», – dedi Máýlen Áshimbaev Senat kýlýarynda.
Senat spikeriniń pikirinshe, qazirgi múshelerdiń ideialary taýsyldy deýge bolmaidy. Degenmen búgingi ózgermeli kezeń memlekettik basqarý isine jańa azamattardy kóbirek tartýdy talap etedi.
«Qazir jańa partiialar qurylyp jatyr, jumys istep turǵan partiialardyń basshylyǵy jańaryp jatyr. Men bul úderisti qoldaimyn. Meniń shynaiy senimim dál qazir jańa adamdarǵa Ádiletti Qazaqstandy qurý aiasynda óz ideialaryn júzege asyrýǵa múmkindik berý kerek», – dedi ol.
Eske salaiyq, Ulttyq quryltaidyń jańa quramyn sailaý tamyz aiynda ótedi.
