قازاقستان ەلشىلىگى اقش-تا زاڭسىز جۇرگەن ەل ازاماتتارىن ءوز ەركىمەن كەرى قايتۋعا شاقىرادى. ولارعا كەيىن قۇرلىقتاعى ەلگە زاڭدى تۇردە بارۋدىڭ زاڭدى جولى دا ۇسىنىلادى، دەپ حابارلايدى Dalanews.kz.
"قۇرمەتتى امەريكا قۇراما شتاتتارىنداعى قازاقستان رەسپۋبليكاسىنىڭ ازاماتتارى! اقش بيلىگى دەپورتاسيالاۋ تۋرالى سوت شەشىمىن السا دا، ەلگە قايتپاي جۇرگەن شەتەلدىك ازاماتتارعا "CBP Home" ءموبيلدى قوسىمشاسىن پايدالانۋ ارقىلى مۇمكىندىگىنشە قىسقا مەرزىمدە ءوز ەركىمەن ەلدەرىنە ورالۋعا شاقىرۋدا ەكەنىنە نازار اۋدارامىز"، دەلىنگەن ەلشىلىك مالىمدەمەسىندە.
"CBP Home" ءموبيلدى قوسىمشاسى ارقىلى ءوز ەلىنە قايتاتىن ازاماتتارعا كەلەسى مۇمكىندىكتەر بەرىلمەك:
- ازاماتتىڭ ءوزى قالاعان رەيسپەن ەرىكتى جانە ءقاۋىپسىز تۇردە ەلگە ورالۋ مۇمكىندىگى بار؛
- اقش-تا جۇمىس جاساپ، تاپقان قاراجاتى ازاماتتىڭ وزىندە قالادى؛
- قۇزىرلى ورگاندار تاراپىنان قاماۋعا الىنبايدى جانە ءماجبۇرلى دەپورتاسياسىز ءوز ەلىنە ورالادى؛
- اۋە بيلەتىن ساتىپ الۋعا مۇمكىندىگى جوق ازاماتتارعا قارجىلاي سۋبسيديا الۋ مۇمكىندىگى بەرىلەدى؛
- بولاشاقتا زاڭدى تۇردە اقش-قا قايتا كەلۋ قۇقىعىنا يە بولادى.
ءوز ەركىمەن ەلدەرىنە قايتپاعان جاعدايدا تومەندەگى شارالاردى قولدانۋ جوسپارلانۋدا:
- جەدەل تۇردە دەپورتاسيالاۋ. اقش ىشكى قاۋىپسىزدىك مينيسترلىگىنىڭ (DHS) قىزمەتكەرلەرى ەشبىر دايىندىقسىز، ازاماتتاردى جەدەل تۇردە قاماۋعا الاتىن بولادى؛
- ايىپپۇلدار مەن سانكسيالار. ەگەر ازامات دەپورتاسيا شەشىمى بولا تۇرىپ، ەلىنە قايتپاعان بولسا وعان تاۋلىگىنە 998 اقش دوللارىن قۇرايتىن ايىپپۇل سالىنادى. بۇل رەتتە ايىپپۇل سالۋ رەتروسپەكتيۆتى تۇردە، ياعني بەس جىل بۇرىن ەلدەن كەتۋ تۋرالى سوت شەشىمى شىققان ازاماتتاردان وندىرىلەدى (بۇل جاعدايدا ايىپپۇل شامامەن 1 ميلليون دوللارعا دەيىن بارۋى مۇمكىن). ايىپپۇلدى تولەۋ مۇمكىندىگى بولماعان جاعدايدا زاڭسىز جۇرگەن شەتەلدىكتەرگە تيەسىلى جىلجىمايتىن جانە باسقا دا مۇلىكتەرىن مەملەكەت مەنشىگىنە الۋ ءتاسىلى قاراستىرىلادى؛
- سونىمەن قاتار، "CBP Home" ارقىلى قايتاتىنىن ءبىلدىرىپ، ەلىنە ورالماعان ازاماتقا 1000-5000 دوللار كولەمىندە قوسىمشا ايىپپۇل سالىنادى؛
- اقش-قا قايتا كەلۋگە تىيىم سالىنادى. اقش اۋماعىنا زاڭدى تۇردە قايتا كىرۋ قۇقىعىنان كوشى-قون جۇيەسى ارقىلى باس تارتۋ.
⠀"وسىعان وراي، ەلشىلىك جاعىمسىز جاعدايلاردىڭ الدىن الۋ ماقساتىندا قازاقستاندىق ازاماتتاردى اقش بيلىگى ۇسىنىلعان مۇمكىندىكتى پايدالانۋعا شاقىرادى".
