Jinalǵandar aldynda sóz sóilegen Elbasy bul kásiporyn indýstriianyń tiregi, al óńirdiń metallýrgiialyq zaýyttary men taý-ken baiytý kombinattary Qazaqstannyń maqtanyshy ekenin atap ótti.
– «Qazmyryshqa» óńirdiń damýyna qatysty da zor áleýmettik jaýapkershilik júktelgen, bul maqsatqa kásiporyn 3 mlrd teńgege deiin qarajat bólgen. Kompaniia esebinen meditsinalyq ortalyq, balabaqsha, tennis ortalyǵy, jabyq bassein, jekpe-jekter saraiy salynýda, ózge de ondaǵan áleýmettik jobalar júzege asyrylýda, – dedi Nursultan Nazarbaev. Óz kezeginde Elbasy óńirdiń áleýmettik-ekonomikalyq damý kórsetkishteri joǵary ekenin de atap ótti.
– Oblysta tek ótken jyly 20 myńnan astam jumys orny ashyldy, 3300 páter, 14 aýrýhana, 21 mektep salyndy. 360 shaqyrym jol jóndeldi. Taǵy 5 mektep ashý josparlanýda. Bul jumystar jalǵasatyn bolady. «Nurly jol» baǵdarlamasy boiynsha aýqymdy jumystar atqarylýda, onyń aiasynda bizder jol, indýstriialyq nysandar, qoljetimdi baspana salyp jatyrmyz. Osynyń bári sizder úshin, árbir qazaqstandyqtyń igiligi úshin jasalýda. Qazaqstandaǵy innovatsiialyq ónimderdiń 20 paiyzy naq osy oblysta ónidirilýi kezdeisoq emes. Óńirge salynǵan investitsiialar kólemi 345 mlrd teńgege jetken. Shaǵyn jáne orta biznesti qoldaýǵa 2 mlrd teńge, óndiristik infraqurylym qurýǵa taǵy 3 mlrd teńge bólinedi. «Jumyspen qamtý – 2020» baǵdarlamasyn iske asyrýǵa memleket 11 mlrd teńge bóldi, – dedi Qazaqstan Prezidenti.
Elbasy óskemendikterdi jańa teatrdyń ashylýymen quttyqtap, eldiń bereke-birligi úshin qoǵamdy rýhani jáne mádeni damytýdyń mańyzdylyǵyn atap ótti. «Bul – mádeniettiń tamasha jańa ordasy. Teatr 600 orynǵa laiyqtalǵan, daiyndyq zaldary, kishi zaly bar. Qazaq jáne orys trýppalarynyń oidaǵydai jumys isteýi úshin barlyq jaǵdai jasalǵan. Sizderdi jańa teatrdyń ashylýymen quttyqtaimyn. Óskemendikter osy zalda akterlerdiń tarihymyz ben qazirgimizdi aishyqtaityn keremet oiynyn kóretinine senimdimin», – dedi.
Sapar barysynda Memleket basshysy Semeidegi Abaidyń «Jidebai-Bórili» memlekettik tarihi-mádeni jáne ádebi-memorialdyq mýzei-qoryǵyna da bardy. Elbasy mýzei jádigerlerin tamashalap, Semei qalasynyń shyǵarmashyl ziialy qaýym ókilderimen kezdesti. Prezident Shyǵys Qazaqstan oblysy mádeni jáne rýhani muralarǵa bai ekenin, olardy saqtaý men damytý memlekettik saiasattyń basymdyqtarynyń biri bolyp qala beretinin atap ótti.
– Shyǵys Qazaqstan – Abai, Shákárim, Muhtar Áýezov týǵan kieli meken. Olardyń shyǵarmalarynda tereń filosofiia tunyp jatyr. Uly Abai barlyq ulttar bir áýlettiń balalary ekenin júz jyl buryn aitqan. Biz búgin eldegi dostyqty, turaqtylyqty nyǵaitýdamyz. Kóptegen elder 100 jylda da jetpegen nársege biz nebary 23 jylda qol jetkizdik. Eger táýelsizdik saqtalmasa, el ekonomikasy damymasa jáne áleýmettik máseleler sheshilmese, halyq igilikke kenelmeidi. Búginde barlyq baǵytta jumys júrgizilip jatyr. Buryn Semeide jylý berýge bailanysty másele boldy, 200 qazandyq qalany tútinge oraityn. Qazir bul problemanyń bári sheshildi. Biz Semei GES-in salý máselesin oilastyryp jatyrmyz. Jalpy, Qazaqstan durys jolda keledi, saiasi turaqtylyqty, ózara túsinistikti jáne dostyqty saqtaý qajet, – dedi Elbasy. Budan keiin Memleket basshysy qaladaǵy óńirlik onkologiialyq dispanserdiń jumysymen tanysty.
– Bul keshenge memleket 7,2 milliard teńge bóldi, sonyń 4 milliardy zamanaýi jabdyqtar alýǵa arnalǵan. Bul – iadrolyq meditsina elementterin qoldanatyn Qazaqstan úshin biregei mekeme. Endi osy jabdyqtardy halyqqa kásibi kómek kórsetý úshin barynsha tiimdi qoldaný sizderge bailanysty. Búkil el boiynsha densaýlyq saqtaý salasyn damytýdyń arqasynda azamattardyń ortasha ómir jasy sońǵy on jylda 64-ten 71-ge deiin ulǵaidy, – dedi.
Nursultan Nazarbaev Semei qalasyndaǵy «Kondiz» JShS konditerlik fabrikasynda bolǵan kezinde oblysta halyqtyń ál-aýqatyn arttyrý úshin qajetti jaǵdailar jasalǵanyna toqtaldy. Atap aitsaq, sońǵy jyldary óńirde áleýmettik jáne sport nysandary, baspana, sondai-aq kólik infraqurylymy nysandary kóptep salynýda. Nursultan Nazarbaev osy sharalar óńir ekonomikasynyń ósýine jáne jańa jumys oryndarynyń ashylýyna yqpal etkenin tilge tiek etti. Nemistiń zamanaýi qural-jabdyqtarymen jabdyqtalǵan fabrikanyń óndiristik qýaty jylyna 22 myń tonna konditer ónimin shyǵarýǵa laiyqtalǵan. Kásiporynda 119 adam jumyspen qamtylǵan. Óz kezeginde Nursultan Nazarbaev Qazaqstannyń mádeni ómirin nyǵaitýdaǵy ekonomikalyq baqýattylyqtyń airyqsha rólin atap ótti. Osylaisha Memleket basshysy Shyǵystyń shyraiyn kirgizgen berekeli isterge oń baǵasyn berdi.
Zeinolla Abajanov
