Qazaqstan Respýblıkasy Bas prokýratýrasynyń Quqyqtyq statısıka jáne arnaıy esepke alý jónindegi komıteti ınternet-alaıaqtyqtyń jańa tásili týraly eskertti, dep habarlaıdy Dalanews.kz 

Sheteldik aqparat kózderiniń dereginshe, qaskóıler jetkizý qyzmetteri, bankter jáne basqarýshy kompanıalar atynan jalǵan hattar men SMS-habarlamalar taratyp, azamattardy ózderi qaıta qońyraý shalýǵa ıtermeleıdi.

Habarlamalar ádette «avtorızasıadaǵy qate», «domofondy aýystyrý», «eseptegishterdi tekserý qajet» degen syltaýmen keledi. Azamat resmı uıymnan keldi dep oılap, habarlamada kórsetilgen nómirge qaıta qońyraý shalǵan kezde, tikeleı alaıaqtyń ózine baılanysady. Osylaısha qaskóıler áleýmettik ınjenerıa ádisterin qoldanýǵa múmkindik alady.

Komıtet mamandary mundaı qýlyqtyń qarqyndy taralyp jatqanyn aıtyp, qazaqstandyqtardy saq bolýǵa shaqyrady.

Maman keńesi:

• Beıtanys hat-habarlar men SMS-terge syn kózben qarańyz;

• Qaıta qońyraý shalatyn bolsańyz, tek uıymnyń resmı saıtynda kórsetilgen nómirdi terińiz;

• Eki faktorly aýtentıfıkasıany qoldanyńyz;

• Bank kartasynyń derekterin, bir rettik qupıa kodtardy jáne ózge de jeke málimetterdi eshkimge bermeńiz.

Quzyrly organ azamattardy qyraǵylyq tanytýǵa jáne kıberqaýipsizdik talaptaryn saqtaýǵa shaqyrdy.