قازاقستان رەسپۋبليكاسى باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى ينتەرنەت-الاياقتىقتىڭ جاڭا ءتاسىلى تۋرالى ەسكەرتتى، دەپ حابارلايدى Dalanews.kz 

شەتەلدىك اقپارات كوزدەرىنىڭ دەرەگىنشە، قاسكويلەر جەتكىزۋ قىزمەتتەرى، بانكتەر جانە باسقارۋشى كومپانيالار اتىنان جالعان حاتتار مەن SMS-حابارلامالار تاراتىپ، ازاماتتاردى وزدەرى قايتا قوڭىراۋ شالۋعا يتەرمەلەيدى.

حابارلامالار ادەتتە «اۆتوريزاسياداعى قاتە»، «دوموفوندى اۋىستىرۋ»، «ەسەپتەگىشتەردى تەكسەرۋ قاجەت» دەگەن سىلتاۋمەن كەلەدى. ازامات رەسمي ۇيىمنان كەلدى دەپ ويلاپ، حابارلامادا كورسەتىلگەن نومىرگە قايتا قوڭىراۋ شالعان كەزدە، تىكەلەي الاياقتىڭ وزىنە بايلانىسادى. وسىلايشا قاسكويلەر الەۋمەتتىك ينجەنەريا ادىستەرىن قولدانۋعا مۇمكىندىك الادى.

كوميتەت ماماندارى مۇنداي قۋلىقتىڭ قارقىندى تارالىپ جاتقانىن ايتىپ، قازاقستاندىقتاردى ساق بولۋعا شاقىرادى.

مامان كەڭەسى:

• بەيتانىس حات-حابارلار مەن SMS-تەرگە سىن كوزبەن قاراڭىز؛

• قايتا قوڭىراۋ شالاتىن بولساڭىز، تەك ۇيىمنىڭ رەسمي سايتىندا كورسەتىلگەن ءنومىردى تەرىڭىز؛

• ەكى فاكتورلى اۋتەنتيفيكاسيانى قولدانىڭىز؛

• بانك كارتاسىنىڭ دەرەكتەرىن، ءبىر رەتتىك قۇپيا كودتاردى جانە وزگە دە جەكە مالىمەتتەردى ەشكىمگە بەرمەڭىز.

قۇزىرلى ورگان ازاماتتاردى قىراعىلىق تانىتۋعا جانە كيبەرقاۋىپسىزدىك تالاپتارىن ساقتاۋعا شاقىردى.