2026 jyly Qazaqstanda stýdenttik sport tarıhyndaǵy mańyzdy oqıǵa ótýi múmkin. Elimizde stýdentter arasyndaǵy bokstan Álem chempıonatyn ótkizý máselesi qarastyrylyp jatyr. Buǵan deıin mundaı deńgeıdegi doda Qazaqstanda sońǵy ret 2006 jyly ótken. Araǵa týra 20 jyl salyp, álemdik jarystyń qaıta oralýy - elimizdiń halyqaralyq sport qaýymdastyǵyndaǵy bedeliniń artqanyn kórsetedi, dep habarlaıdy Dalanews.kz
Bul bastamany Halyqaralyq ýnıversıtetter sporty federasıasy (FISU) kóterip otyr. Uıym Qazaqstannyń sońǵy jyldary álemdik deńgeıdegi iri sporttyq sharalardy joǵary uıymdastyrýshylyq deńgeıde ótkizgenin erekshe atap ótken.
28 qarashada Qytaıdyń Makao qalasynda ótken Azıa ýnıversıtettik sport federasıasynyń Bas Assambleıasyna Qazaqstan atynan Ulttyq stýdentter sport odaǵynyń prezıdenti Qaırat Zakıránov qatysty. Jıynda aımaqtyq ýnıversıtettik sportty damytý, jańa yntymaqtastyq strategıalary jáne Ortalyq Azıadaǵy stýdenttik sport jobalaryn ilgeriletý máseleleri talqylandy.
Qaırat Zakıránovtyń aıtýynsha, Qazaqstanda stýdentter arasyndaǵy bokstan Álem chempıonatyn ótkizý týraly bastama - halyqaralyq uıymdardyń elimizge degen zor seniminiń belgisi.
«Bul usynys FISU men ózge de halyqaralyq uıymdardyń Qazaqstanǵa degen joǵary senimin kórsetedi. FISU prezıdenti Leons Eder elimizdiń sporttyq is-sharalardy uıymdastyrýda mol tájirıbesi bar ekenin atap ótti. Máselen, 2017 jyly ótken Búkilálemdik qysqy Ýnıversıadanyń joǵary deńgeıde uıymdastyrylýy - sonyń aıqyn dáleli», - dedi ol.
Chempıonatty ótkizý máselesi WORLD Boxing halyqaralyq uıymynyń qoldaýymen talqylanyp jatyr. Aıta keteıik, atalǵan uıymdy álem chempıony, qazaqstandyq boksshy Gennadıı Golovkın basqarady. Sarapshylardyń aıtýynsha, uıymnyń qoldaýy jarystyń halyqaralyq mártebesin arttyryp, álemniń úzdik jas boksshylarynyń qyzyǵýshylyǵyn kúsheıtedi.
Sonymen qatar, FISU Qazaqstanda 2029 jylǵy Búkilálemdik qysqy Ýnıversıadany ekinshi ret ótkizý múmkindigin de qarastyrǵan. Bul da halyqaralyq qaýymdastyqtyń elimizge degen seniminiń joǵary ekenin kórsetedi.
Eger sheshim oń qabyldansa, Qazaqstan 2026 jyly álemdik stýdenttik sporttyń basty ortalyqtarynyń birine aınalýy yqtımal.
