Qazaqstandyq boksshy Dýlat Bekbaýov doping erejesin buzǵany úshin eki jylǵa sporttan shettetiledi. Bul týraly Halyqaralyq testileý agenttigi (ITA) Halyqaralyq boks qaýymdastyǵy (IBA) atynan málimdedi, dep habarlaidy Dalanews.kz.
Sheshim 2025 jyldyń 18 qarashasynan 2027 jyldyń 17 qarashasyna deiin kúshinde bolady. Sonymen qatar sportshynyń 2025 jyldyń 1 qańtarynan bergi barlyq nátijesi joiylady.
Nege shettetildi?
IBA-nyń antidoping erejeleriniń 2.4-babyna sai, Bekbaýov bir jyl ishinde úsh ret ornalasqan jeri týraly málimetti ýaqytynda engizbegen. Bul antidoping júiesindegi eleýli tártip buzýshylyq sanalady. Sportshy bul faktilerdi joqqa shyǵarmai, sheshimge qarsy shaǵym túsirmegen.
ITA-nyń málimetinshe, bul sheshim IBA-nyń 13.2.3-babyna sáikes CAS-tyń apelliatsiialyq alqasyna shaǵymdaný arqyly qaita qaralýy múmkin. Agenttik is boiynsha qosymsha túsinikteme bermeitinin atap ótti.
Aita keteiik, Dýlat Bekbaýov — Qazaqstan ulttyq quramasynyń múshesi, halyqaralyq áýesqoi týrnirlerdiń qatysýshysy. Ol 2022 jylǵy Aziia chempionatynyń jáne 2023 jylǵy álem birinshiliginiń kúmis júldegeri.
Eske salsaq, buǵan deiin qazaqstandyq kásibi boksshy Jánibek Álimhanuly da doping daýyna iligip, 6 jeltoqsanda AQSh-ta ótetin Erislandi Laraǵa qarsy chempiondyq jekpe-jegi toqtatylǵan edi.
