Búgin qasietti qarashańyraqta Abai ýniversiteti jáne Aitys aqyndary men jyrshy-termeshilerdiń halyqaralyq odaǵynyń uiymdastyrýymen «Qazaqta qara sózge des bermedim» I respýblikalyq jas aqyndar aitysy ótti. Qara óleńniń kórigin qyzdyrǵan sóz saiysynda elimizdiń 10 oblysynan, 12 jetekshi ýniversitetinen kelgen 14 jas talant baq synady, dep habarlaidy Dalanews.kz
Tól ónerimizdi jańǵyrtý, aitys ónerin keńinen nasihattaý, jas aqyndardyń sýyryp salmalyq qabiletterin shyńdaýdy maqsat etken dúbirli doda – aitystyń altyn dińgegi Súiinbai Aronulynyń 210 jyldyǵyna, Abai Qunanbaiulynyń 180 jyldyǵyna jáne aitys aqtańgeri Orazaly Dosbosynovtyń 50 jyldyq mereitoiyna arnaldy.
Respýblikalyq básekeni ashqan Abai atyndaǵy QazUPÝ Basqarma tóraǵasy-Rektory Bolat Tilep rýhani qundylyǵy joǵary óner jarysynyń mańyzy men mánin aityp, qatysýshylarǵa sáttilik tiledi. Ulttyq ónerdi qoldaý – el rýhaniiatyn damytýdaǵy mańyzdy qadam ekenin aitqan aitystyń bas demeýshisi «Taza brend» otandyq ónimder kompaniiasynyń direktory Jibek Amankeldina jastardyń shyǵarmashylyq jolyna demeý bolý – árbir otandyq ónim óndirýshiniń azamattyq boryshy ekenin erekshe atap ótti.
Tapqyrlyq pen qaljyńnan «qýyrdaq qýyrǵan» sóz saiysyna aitysker aqyn, QR Mádeniet qairatkeri, Aitys aqyndary men jyrshy, termeshilerdiń halyqaralyq Odaǵynyń Almaty qalasy boiynsha filialynyń tóraǵasy Serik Qaliev (qazylar alqasynyń tóraǵasy), aitysker aqyn, Qazaqstan Jazýshylar odaǵynyń múshesi, Orazaly Dosbosynovtyń ustazy Daýbai Ábdisaev, Aitys aqyndary men jyrshy-termeshilerdiń halyqaralyq odaǵynyń múshesi, Mádeniet jáne Aqparat salasynyń úzdigi, «Qazaq radiolary» JShS Almaty filialynyń jetekshisi, «Qurmet» ordeniniń iegeri Baqyt Qutpanbai, Abai atyndaǵy Qazaq ulttyq pedagogikalyq ýniversiteti, «Hakim Abai» ǵylymi-zertteý ortalyǵynyń direktory, filologiia ǵylymdarynyń kandidaty Jabal Shoiynbet, aitysker aqyn, Aitys aqyndary men jyrshy-termeshilerdiń halyqaralyq odaǵynyń múshesi, Mádeniet salasynyń úzdigi Shuǵaiyp Sezimhan qazylyq jasady.
Irikteý kezeńinde 14 aqyn óz ónerlerin ortaǵa salyp, qazylar alqasynyń joǵary upaiyna ie bolǵan 8 aqyn ekinshi kezeńge joldama aldy. Úmitkerler sheberligi saralanyp jatqanda, sahnada ýniversitet stýdentteri óner kórsetip, kontsert qoidy.
Baiqaý qorytyndysy boiynsha Bas júlde Aqtóbe oblysy A.Jubanov atyndaǵy ýniversitetiniń stýdenti Arai Nuradinge buiyrdy. Ol 400 000 teńge qarjylai syilyqqa ie boldy. Al I orynǵa Almatynyń qalasy Abai atyndaǵy QazUPÝ-dyń stýdenti Daniiar Bolathan ie bolyp, 300 000 teńge ielendi. II oryndy Almaty qalasy Abai atyndaǵy QazUPÝ stýdenti Sanjar Daiarbek pen ShQO S.Amanjolov atyndaǵy ýniversitettiń stýdenti Aiǵanym Balǵabaeva ózara bólisip, árqaisysy 200 000 teńge kóleminde qarjylai syilyq jeńip aldy. 150 teńgeden turatyn III oryn tórt qatysýshy: Astana qalasy K.Báiseiitova atyndaǵy QazUÓÝ stýdenti Marsel Ersaiynovqa, Jambyl oblysy Sh.Murtaza atyndaǵy ýniversitettiń stýdenti Janerke Qambarǵa, Pavlodar oblysy Á.Marǵulan atyndaǵy ýniversitet Nurbek Bákirge jáne Qyzylorda oblysy Qorqyt ata atyndaǵy QyzMÝ stýdenti Dilnaz Erjigitke buiyrdy.
Sonymen qatar, qalǵan aqyndar arnaiy nominatsiialar boiynsha 100 000 teńge kólemindegi aqshalai sailyq ielendi. Olar:
Esenqul Jaqypbekov atyndaǵy arnaiy júlde – Erasyl Seitjanuly (Astana qalasy, L.Gýmilev atyndaǵy EUÝ);
Serik Ydyrysov atyndaǵy arnaiy júlde – Arystan Aǵybai (Almaty oblysy, SDÝ);
Siiazbek Súleimenov atyndaǵy arnaiy júlde – Serikbol Bazylbek (Mańǵystaý oblysy, Sh.Esenov atyndaǵy ýniversitet);
Erik Asqarov atyndaǵy arnaiy júlde – Daniial Bolysbek (Túrkistan oblysy, Ó.Jánibekov atyndaǵy ýniversitet);
Temirhan Tebegenov atyndaǵy arnaiy júlde – Abylai Qairatuly (Almaty qalasy, ál-Farabi atyndaǵy QazUÝ);
Hasen Samatyrov atyndaǵy arnaiy júlde – Maǵjan Saýytbek (Shymkent qalasy, Saz kolledji).
Aita keteiik, kúni keshe Abai atyndaǵy QazUPÝ-da ýniversitet túlegi, aitys óneriniń aqtańgeri, ot aýyzdy, oraq tildi aqyn Orazaly Dosbosynov atyndaǵy jas aqyndar ortalyǵy zamanaýi úlgide qaita jańǵyryp, resmi túrde ashylǵan bolatyn. Onda respýblikalyq jas aitysker aqyndar túrli dárister tyńdap, ónerlerin jetildiredi. Basty maqsaty – tól ónerimizdi jańǵyrtý, aitys ónerin keńinen nasihattaý, jas aqyndardyń sýyryp-salmalyq qabiletterin shyńdaý. Orazaly ortalyǵy budan keiin respýblikalyq jáne halyqaralyq jas aqyndar aitysyn dástúrli túrde ótkizip turmaq.
