Qazaqstannyń áigili aqyny, qoǵam qairatkeri Oljas Súleimenov Beibitshilik salasyndaǵy Nobel syilyǵyna usynyldy. Bul týraly «Baitaq» jasyldar partiiasynyń baspasóz qyzmeti málimdedi, dep habarlaidy Dalanews.kz.
«Búgin Almatyda ótken «Baitaq» partiiasynyń qalalyq filialynyń V konferentsiiasynda tarihi ári mańyzdy sheshim qabyldandy. Partiia tóraǵasy Azamathan Ámirtaev kórnekti qazaq jazýshysy, qoǵam qairatkeri jáne «Nevada–Semei» antiiadrolyq qozǵalysynyń negizin qalaýshy Oljas Súleimenovti Nobel syilyǵyna resmi túrde usynǵanyn jariialady», – delingen habarlamada.
Partiia ókilderiniń aitýynsha, bul bastama – Súleimenovtiń Qazaqstanda ǵana emes, búkil álemde beibitshilik jolynda atqarǵan eńbegine berilgen joǵary baǵa.
«Oljas Súleimenovtiń, ásirese «Nevada–Semei» qozǵalysy aiasyndaǵy qyzmeti Semei iadrolyq synaq poligonyn jabýda sheshýshi ról atqardy. Onyń bastamalary men Qazaqstannyń halyqaralyq arenadaǵy belsendi jumysynyń arqasynda AQSh-tyń Nevada shtatyn qosa alǵanda, birneshe elde tórt iri iadrolyq poligon jabyldy. Bul – jahandyq qaýipsizdikke qosylǵan zor úles», – dep atap ótti partiia músheleri.
Azamathan Ámirtaevtyń sózinshe, Súleimenov – qazaq halqynyń rýhani tiregi ǵana emes, álemge beibitshilik únin jetkizgen biregei tulǵa. Sondyqtan ony Nobel syilyǵyna usyný – tarihi ádildik.
Partiia ókilderi bul bastama Qazaqstannyń halyqaralyq bedelin arttyryp, eldiń beibitshil saiasatyndaǵy ustanymyn jańa deńgeige kóteretinine senim bildirdi.
Oljas Súleimenov týraly
Oljas Súleimenov – Qazaqstannyń halyq jazýshysy, Sotsialistik Eńbek Eri (1991), Abai atyndaǵy Qazaq KSR Memlekettik syilyǵynyń laýreaty (1973). «Sinie ostrova» poemasy úshin berilgen bul marapattan bólek, ol Lenin komsomoly syilyǵynyń (1967), «Tarlan» syilyǵynyń iegeri. «Barys» ordeniniń I dárejeli iegeri, Oktiabr revoliýtsiiasy, Eńbek Qyzyl Tý, «Qurmet belgisi» ordenderi men kóptegen medaldyń iegeri.
1989 jyly álemge áigili «Nevada – Semei» antiiadrolyq qozǵalysyn qurdy. Birneshe ýniversitettiń qurmetti doktory.
Súleimenov – «Zemlia, poklonis cheloveký» (1961, Iu. Gagaringe arnalǵan), «Glinianaia kniga» (1969), «Az i Ia» (1975) sekildi tanymal týyndylardyń, «Argamaki», «Solnechnye nochi», «Povtoriaia v polden» jáne basqa da kóptegen jyr jinaqtarynyń avtory.
