Konferentsiiaǵa óńir kolledjderiniń stýdentteri qatysyp, óz jumystaryn bilikti qazylar alqasynyń qaraýyna usyndy. Qazylar eń úzdik jumystardy anyqtap, jeńimpazdar baǵaly syilyqtarmen marapattaldy, dep habarlaidy Dalanews.kz.
Abai oblysy ishki saiasat basqarmasynyń oblystyq Qazaqstan halqy Assambleiasy hatshylyǵynyń jáne etnosaralyq qatynastar monitoringileý bóliminiń basshysy Maǵjan Qurmanovtyń aitýynsha, ǵylymi-tájiribelik konferentsiia ótkizý tek bilim berý turǵysynan ǵana emes, jalpy qoǵam úshin de mańyzdy.
– Búgin biz stýdentter arasynda «Polietnikalyq qoǵamdaǵy birlik pen yntymaqtastyq» atty ǵylymi-tájiribelik konferentsiia ótýde. Qatysýshylardyń jumystaryn qaraǵan bilikti qazylar alqasy eń úzdikterin anyqtady. Bul taqyryp óte mańyzdy jáne jan-jaqty zertteýdi qajet etedi. Konferentsiiaǵa qatysýshylardyń barlyǵyn laiyqty jetistikterimen quttyqtaimyn, – dedi Maǵjan Qurmanov.
Konferentsiiaǵa qatysýshy, «Semei» kópsalaly kolledjiniń stýdenti Didar Naýryzhan óz áserimen bólisti.
– Mundai konferentsiialarǵa qatysý biz úshin úlken múmkindikter ashady. Óz baiandamama daiyndyq barysynda Abaidyń shyǵarmashylyǵyn tereń zerttep, onyń talantynyń jańa qyrlaryn tanydym. Daiyndyq kezinde Dostyq úiimen jáne Abai atyndaǵy oblystyq kitaphanamen jumys istedim. Óte kóp maǵlumat aldym, aldaǵy ýaqytta da osyndai konferentsiialarǵa qatysýdy josparlap otyrmyn, – dedi Didar Naýryzhan.
Semei qarjy-ekonomika kolledjiniń stýdenti Amina Talǵatova da konferentsiiaǵa arnaiy daiyndaǵan baiandamasymen birinshi oryndy ielengenin aityp, bul taqyrypqa qyzyǵýshylyǵynyń artqanyn jetkizdi.
– Men «Ártúrli etnostardyń Semei qalasynyń ekonomikasyna qosqan úlesi» atty baiandamammen birinshi oryn aldym. Bul taqyrypty tańdaǵan sebebim – oblysymyzda jáne jalpy elimizde kóptegen túrli etnostardyń ómir súretini belgili, biraq olardyń ekonomikalyq ósimge qosqan úlesi kópshilikke beimálim. Taqyrypty muqiiat zerttei kele, onyń óte tereń ekenine jáne áli de talai zertteýdi qajet etetinine kóz jetkizdim, – dedi Amina Talǵatova.
