كونفەرەنسياعا ءوڭىر كوللەدجدەرىنىڭ ستۋدەنتتەرى قاتىسىپ، ءوز جۇمىستارىن بىلىكتى قازىلار القاسىنىڭ قاراۋىنا ۇسىندى. قازىلار ەڭ ۇزدىك جۇمىستاردى انىقتاپ، جەڭىمپازدار باعالى سىيلىقتارمەن ماراپاتتالدى، دەپ حابارلايدى Dalanews.kz.
اباي وبلىسى ىشكى ساياسات باسقارماسىنىڭ وبلىستىق قازاقستان حالقى اسسامبلەياسى حاتشىلىعىنىڭ جانە ەتنوسارالىق قاتىناستار مونيتورينگىلەۋ ءبولىمىنىڭ باسشىسى ماعجان قۇرمانوۆتىڭ ايتۋىنشا، عىلىمي-تاجىريبەلىك كونفەرەنسيا وتكىزۋ تەك ءبىلىم بەرۋ تۇرعىسىنان عانا ەمەس، جالپى قوعام ءۇشىن دە ماڭىزدى.
– بۇگىن ءبىز ستۋدەنتتەر اراسىندا «پوليەتنيكالىق قوعامداعى بىرلىك پەن ىنتىماقتاستىق» اتتى عىلىمي-تاجىريبەلىك كونفەرەنسيا وتۋدە. قاتىسۋشىلاردىڭ جۇمىستارىن قاراعان بىلىكتى قازىلار القاسى ەڭ ۇزدىكتەرىن انىقتادى. بۇل تاقىرىپ وتە ماڭىزدى جانە جان-جاقتى زەرتتەۋدى قاجەت ەتەدى. كونفەرەنسياعا قاتىسۋشىلاردىڭ بارلىعىن لايىقتى جەتىستىكتەرىمەن قۇتتىقتايمىن، – دەدى ماعجان قۇرمانوۆ.
كونفەرەنسياعا قاتىسۋشى، «سەمەي» كوپسالالى كوللەدجىنىڭ ستۋدەنتى ديدار ناۋرىزحان ءوز اسەرىمەن ءبولىستى.
– مۇنداي كونفەرەنسيالارعا قاتىسۋ ءبىز ءۇشىن ۇلكەن مۇمكىندىكتەر اشادى. ءوز بايانداماما دايىندىق بارىسىندا ابايدىڭ شىعارماشىلىعىن تەرەڭ زەرتتەپ، ونىڭ تالانتىنىڭ جاڭا قىرلارىن تانىدىم. دايىندىق كەزىندە دوستىق ۇيىمەن جانە اباي اتىنداعى وبلىستىق كىتاپحانامەن جۇمىس ىستەدىم. وتە كوپ ماعلۇمات الدىم، الداعى ۋاقىتتا دا وسىنداي كونفەرەنسيالارعا قاتىسۋدى جوسپارلاپ وتىرمىن، – دەدى ديدار ناۋرىزحان.
سەمەي قارجى-ەكونوميكا كوللەدجىنىڭ ستۋدەنتى امينا تالعاتوۆا دا كونفەرەنسياعا ارنايى دايىنداعان بايانداماسىمەن ءبىرىنشى ورىندى يەلەنگەنىن ايتىپ، بۇل تاقىرىپقا قىزىعۋشىلىعىنىڭ ارتقانىن جەتكىزدى.
– مەن «ءارتۇرلى ەتنوستاردىڭ سەمەي قالاسىنىڭ ەكونوميكاسىنا قوسقان ۇلەسى» اتتى بايانداماممەن ءبىرىنشى ورىن الدىم. بۇل تاقىرىپتى تاڭداعان سەبەبىم – وبلىسىمىزدا جانە جالپى ەلىمىزدە كوپتەگەن ءتۇرلى ەتنوستاردىڭ ءومىر سۇرەتىنى بەلگىلى، ءبىراق ولاردىڭ ەكونوميكالىق وسىمگە قوسقان ۇلەسى كوپشىلىككە بەيمالىم. تاقىرىپتى مۇقيات زەرتتەي كەلە، ونىڭ وتە تەرەڭ ەكەنىنە جانە ءالى دە تالاي زەرتتەۋدى قاجەت ەتەتىنىنە كوز جەتكىزدىم، – دەدى امينا تالعاتوۆا.
