Etnofestivaldiń birinshi kúni – «Taǵylym»; ekinshi kúni – «Dástúrler jańǵyryǵy»; Úshinshi kúni – «Salbýryn» ataýymen belgilengen. Taǵy bir mańyzdy shara - 4–6 jeltoqsan kúnderi aýyl-aimaqtarda soǵymnyń dástúrli sybaǵasy taratylyp, úlken-kishige qurmet kórsetilýinde, dep habarlaidy Dalanews.kz.
«Taǵylym» kúninde bilim berý uiymdarynda ulttyq qundylyqtardy dáripteitin tanymdyq sabaqtar men sheberlik saǵattary ótti.
Búgin «Sybaǵa – 2025» ulttyq dástúrler festivali saltanatty túrde Aqtóbedegi Óner ortalyǵynyń aldynda «Altybaqan» mádeni oiyn-saýyq baǵdarlamasymen bastaldy. Ulttyq oiyndar men dástúrli áýender toǵysqan, ulttyq naqyshqa toly sahnalyq kórinister festivaldiń bastalýyna sán berip, kelgen jurtshylyqty óner merekesiniń rýhyna bóledi.
Etnofestivaldiń ashylý saltanatynda oblys ákimi Ashat Shaharov quttyqtaý sóz sóilep, «Sybaǵa» ulttyq dástúrler festivaliniń aimaqta ekinshi jyl qatarynan ótkizilip otyrǵanyn atap ótti.
«Memleket basshysy Qasym-Jomart Toqaev Ulttyq quryltai otyrysynda «Ótkenimen ǵana ómir súretin jurt órkenietti el bola almaidy. Ult sapasyn jaqsartamyz desek, bir el bolyp jańa qundylyqtar júiesin qalyptastyrýymyz qajet» - dep atap ótken bolatyn. Salt-dástúr – adamzat úshin ilgerileýdiń sarqylmas qainar kózi. Ǵylymi-tehnikalyq progress qansha damyǵanymen, qolda bar jetistikterdiń irgetasyn qalaǵan qundylyqtardan bas tartýǵa bolmaityndyǵyn óskeleń urpaqqa jetkizý basty mindet», - dedi óńir basshysy.
Aityp ótý kerek, Aqtóbede ótip jatqan halyqaralyq investitsiialyq forým aiasynda 20 memleketten kelgen delegatsiia jáne 7 elshi sharaǵa qatysty. Ákim qonaqtarǵa rizashylyǵyn bildirip, ulttyq mádenietti damytýǵa atsalysyp júrgen sheberler men ónersúier qaýymǵa alǵysyn jetkizdi.
Ulttyq bolmysymyzdy dáriptep, ata-babadan miras bolǵan rýhani qazynany zamanaýi úlgide nasihattaýǵa baǵyttalǵan etnofestival aiasynda «Dástúrler jańǵyryǵy» atty úlken kontserttik baǵdarlama ótti.
Baǵdarlama barysynda kórermenderge halyq ánderi, jyr-dastandar, kúiler, ulttyq aspaptyq kompozitsiialar, sondai-aq otandyq dizainerlerdiń etnostildegi toptamalary usynyldy. «Tárbiia», Meiramgúl Taýbatyrova, Qyrǵyzstan Respýblikasynan Gúlmira Akmatova, Sábina Kúnkei, mańǵystaýlyq Jannar Meńdiqulova, Inabat Eskendir syndy dizainerlerdiń toptamalary ulttyq kiim mádenietiniń ásem órnegin pash etti.
Kontserttiń sharyqtaý shegi – Qazaqstannyń halyq ártisi Tamara Asardyń oryndaýyndaǵy ásem ánder boldy. Kórermen qaýym belgili ánshiniń ónerin zor yqylaspen qabyldady.
Al «Sarqyt» meiramhanasynda uiymdastyrylǵan «Kóneden jetken dám» gastro-festivalinde oblystyń árbir aýdany ózine tán ulttyq taǵamdaryn usynyp, olardyń shyǵý tarihy men simvoldyq máni týraly áńgimeledi. Qonaqtardyń erekshe nazaryn aýdarǵan taǵamdardyń biri — úlpershek, ol dástúrde ata-ananyń qyzyna degen qamqorlyǵy men meiirimin bildiredi.
Festival qatysýshysy Nazifa Aldrapekova bul taǵamnyń buryn jas kelinshek alǵash ret tórkinine kelgen kezde arnaiy daiyndalǵanyn aitty.
«Uzatylatyn qyzǵa daiyndalatyn taǵamdy jasadym. Buryn turmysqa shyqqan qyz bala súigen soń ǵana ata-anasyna qonaqqa barǵan. Sol kezde tórkini oǵan arnap erekshe taǵam — úlpershek ázirlegen», — dedi ol.
Qatysýshylar men qonaqtardyń aitýynsha, festival dám merekesi ǵana emes, tereńnen tamyr tartqan mádeni dástúrlerdi qaita tanyp-bilýge múmkindik bergen shara boldy.
