Búgin Shieli kentindegi «Shuǵyla» móltek aýdanynda áleýmettik osal toptaǵy otbasylar úshin salynǵan turǵyn úidiń kiltin tabystaý rásimi ótti. Oǵan oblystyq máslihat tóraǵasy Murat Tleýmbetov, oblys ákiminiń orynbasary Ardaq Zebeshev, ziialy qaýym ókilderi men turǵyndar qatysty, dep habarlaidy Dalanews.kz
Oblystyq máslihat tóraǵasy jańa úi ielerine izgi tilegin bildirip, oblys ákimi Nurlybek Nálibaevtyń quttyqtaýyn jetkizdi.
«Memleket basshysy Qasym-Jomart Kemeluly baspana jurtshylyqtyń turmys sapasyn tanytatyn mańyzdy kórsetkish ekenin atap ótti. Aimaqta Prezidentimizdiń, Úkimettiń erekshe qoldaýymen, jerlesterimizdiń bekem birliginiń arqasynda baiypty bastamalar qolǵa alynyp, jasampaz jobalar iske asyrylýda. Óńirdiń sáýlettik kelbeti kún saiyn jańaryp keledi. Árbir balanyń shyǵarmashylyqpen, sportpen ainalysýyna memleket tarapynan barlyq múmkindik jasalǵan.
«Qýatty óńirler – qýatty el» qaǵidaty el damýynyń temirqazyǵyna ainaldy. Bul halyqtyń yntymaǵyn nyǵaityp, memlekettiń qýatyn arttyrady. Ádiletti, Qýatty, Qaýipsiz ári Taza Qazaqstandy qurý jolynda Syr jurtshylyǵy da bekem birliktiń, eren eńbektiń úlgisin kórsetýde.
Óńirimizdiń negizgi makroekonomikalyq kórsetkishteriniń ósimi qamtamasyz etildi. Keibir kórsetkishterdiń mánin tereń túsinýimiz qajet. Óitkeni, ol – jai ǵana statistika emes, jerlesterimizdiń eseli eńbeginiń jemisi.
Búgin – memlekettiń qoldaýymen baspanaly bolýǵa talap qylǵan árbir otbasy úshin erekshe qýanyshty kún! Jańa úilerińizdiń irgetasy berik, qabyrǵasy myǵym, ishindegi ár otbasynyń shańyraǵy tatýlyq pen berekege toly bolǵai!», – dedi M.Tleýmbetov.
Rásimde Shieli aýdanynyń áleýmettik-ekonomikalyq damýyna úles qosqan azamattar men turǵyn úidi salǵan merdiger mekeme qyzmetkerleri Qyzylorda oblysy ákiminiń Alǵys hatymen marapattaldy. Eńbek ardageri T.Jaǵypbarov jinalǵan jurtshylyqqa bata berdi.
