بۇگىن شيەلى كەنتىندەگى «شۇعىلا» مولتەك اۋدانىندا الەۋمەتتىك وسال توپتاعى وتباسىلار ءۇشىن سالىنعان تۇرعىن ءۇيدىڭ كىلتىن تابىستاۋ ءراسىمى ءوتتى. وعان وبلىستىق ءماسليحات ءتوراعاسى مۇرات تلەۋمبەتوۆ، وبلىس اكىمىنىڭ ورىنباسارى ارداق زەبەشيەۆ، زيالى قاۋىم وكىلدەرى مەن تۇرعىندار قاتىستى، دەپ حابارلايدى Dalanews.kz
وبلىستىق ءماسليحات ءتوراعاسى جاڭا ءۇي يەلەرىنە ىزگى تىلەگىن ءبىلدىرىپ، وبلىس اكىمى نۇرلىبەك نالىبايەۆتىڭ قۇتتىقتاۋىن جەتكىزدى.
«مەملەكەت باسشىسى قاسىم-جومارت كەمەل ۇلى باسپانا جۇرتشىلىقتىڭ تۇرمىس ساپاسىن تانىتاتىن ماڭىزدى كورسەتكىش ەكەنىن اتاپ ءوتتى. ايماقتا پرەزيدەنتىمىزدىڭ، ۇكىمەتتىڭ ەرەكشە قولداۋىمەن، جەرلەستەرىمىزدىڭ بەكەم بىرلىگىنىڭ ارقاسىندا بايىپتى باستامالار قولعا الىنىپ، جاسامپاز جوبالار ىسكە اسىرىلۋدا. ءوڭىردىڭ ساۋلەتتىك كەلبەتى كۇن سايىن جاڭارىپ كەلەدى. ءاربىر بالانىڭ شىعارماشىلىقپەن، سپورتپەن اينالىسۋىنا مەملەكەت تاراپىنان بارلىق مۇمكىندىك جاسالعان.
«قۋاتتى وڭىرلەر – قۋاتتى ەل» قاعيداتى ەل دامۋىنىڭ تەمىرقازىعىنا اينالدى. بۇل حالىقتىڭ ىنتىماعىن نىعايتىپ، مەملەكەتتىڭ قۋاتىن ارتتىرادى. ادىلەتتى، قۋاتتى، ءقاۋىپسىز ءارى تازا قازاقستاندى قۇرۋ جولىندا سىر جۇرتشىلىعى دا بەكەم بىرلىكتىڭ، ەرەن ەڭبەكتىڭ ۇلگىسىن كورسەتۋدە.
ءوڭىرىمىزدىڭ نەگىزگى ماكروەكونوميكالىق كورسەتكىشتەرىنىڭ ءوسىمى قامتاماسىز ەتىلدى. كەيبىر كورسەتكىشتەردىڭ ءمانىن تەرەڭ ءتۇسىنۋىمىز قاجەت. ويتكەنى، ول – جاي عانا ستاتيستيكا ەمەس، جەرلەستەرىمىزدىڭ ەسەلى ەڭبەگىنىڭ جەمىسى.
بۇگىن – مەملەكەتتىڭ قولداۋىمەن باسپانالى بولۋعا تالاپ قىلعان ءاربىر وتباسى ءۇشىن ەرەكشە قۋانىشتى كۇن! جاڭا ۇيلەرىڭىزدىڭ ىرگەتاسى بەرىك، قابىرعاسى مىعىم، ىشىندەگى ءار وتباسىنىڭ شاڭىراعى تاتۋلىق پەن بەرەكەگە تولى بولعاي!»، – دەدى م.تلەۋمبەتوۆ.
راسىمدە شيەلى اۋدانىنىڭ الەۋمەتتىك-ەكونوميكالىق دامۋىنا ۇلەس قوسقان ازاماتتار مەن تۇرعىن ءۇيدى سالعان مەردىگەر مەكەمە قىزمەتكەرلەرى قىزىلوردا وبلىسى اكىمىنىڭ العىس حاتىمەن ماراپاتتالدى. ەڭبەك ارداگەرى ت.جاعىپباروۆ جينالعان جۇرتشىلىققا باتا بەردى.
