Qazaqstannyń Qarjy ministrligi biznes úshin salyqtardy keiinge qaldyrý jáne bólip tóleý rásimin jeńildetetin jańa tártip engizdi. Bul týraly vitse-ministr Erjan Birjanov málimdedi, dep habarlaidy Dalanews.kz.
Onyń sózinshe, buryn mundai jeńildikti alý úshin kásipkerler bank kepildigin usynýǵa nemese múlikti kepilge qoiýǵa mindetti bolǵan. Osy talap bereshegi bar kóptegen salyq tóleýshilerge aitarlyqtai kedergi keltirgen.
"Biz kásipkerlerge jańa múmkindik berdik. Endi 1500 AEK-ke deiin (shamamen 5,9 mln teńge) qaryzy bar biznes sýbektileri múlikti kepilge qoimai jáne bank kepildiginsiz 1 jylǵa deiin salyq tóleýdi keiinge qaldyrýǵa nemese bólip tóleýge ótinish bere alady. Bul olardyń kepil múlkin baǵalaý, saqtandyrý shyǵyndarynan bosatyp, rásimdeý ýaqytyn aitarlyqtai qysqartady", – dedi Birjanov.
Kásipkerler mundai qoldaýǵa ózderine qarasty kez kelgen aýdandyq memlekettik kirister departamenti arqyly ótinish bere alady.
